- Publika iha: 31 Julho 2014
Membru Parlamentu Nasional kestiona maka’as kona ba ema estranjeirus balun ne’ebe tuur iha estrutura administrasaun publiku nian, enkuantu Timor oan barak mos iha kapasidade atu jere administrasaun.
Membru Komisaun F (saude, edukasaun, Kultura, veteranus no igualdade jeneru), Deputadu Eladio Faculto, hateten ministru sira iha kompetensia atu foti desizaun, maibe tenke fo mos oportunidade ba Timor oan sira.
Nia hato’o kestaun ida ne’e, tanba iha estruturas foun Ospital Nasional Guido Valadares (HNGV) nian, kargu rua mak xefia husi ema estranjeirus.
“Tenke fo oportunidade ba Timor oan sira, kapasita no profesionaliza sira atu kaer servisu adminsitrasaun iha linha ministerio sira,” Deputadu Faculto sujere, iha Parlamentu Nasional.
Problema ne’e la’os akontese deit iha HNGV, maibe, nia hateten, iha mos ministerio balun hanesan Ministerio Komersio Industria no Ambeinte (MCIA).
Enkuantu iha dia 12 Junu 2014, Ministerio Saude fo pose ba iha estrutura administrasaun foun HNGV, e membru nain rua ida husi nasaun Nepal no Australia mak kaer kargu Xefe Departamentu Materidade no Pedeatria.
Seidauk iha razaun klaru, maibe bainhira husu kestaun ne’e iha Ministru Saude, Sergio da Costa Lobo, nia dehan, medikus hotu iha HNGV ne’e bele tuur iha kualker kargu.
“Iha HNGV laiha medikus estrangeirus no nasional, hotu –hotu medikus bele tuur iha kargu tekniku profesional sira,” Ministru Lobo hateten.
Iha parte seluk, Prezidente Komisaun Funsaun Publika (KFP), Liborio Pereira, hateten iha kazu esensional sira, estatutu funsaun publika fo dalan atu ema estranjeirus sira okupa, tanba area espesialidade Timor oan sei menus.
“Ne’e kazu esensional, se laiha duni Timor oan ida ne’ebe hatudu, katak nia bele halo servisu ne’e, entaun estado kontratu ema sira ne’e fo konfiansa ba sira hodi hein ita nia ema ne’ebe kapasita dadaun,” Komisariu Pereira hateten.
Nia dehan, problema hanesan akontese mos iha Ministeriu Finansas, responsavel jestaun finanseira, kaer husi ema estranjeiru.
Tanba ne’e, nia husu ba Timor oan sira esforsu an hodi manan esperiensia husi ema seluk, nune’e ba futuru bele kaer rasik administrasaun.
