- Publika iha: 12 Setembro 2015
Rosaria Martins da Cruz, nudar komunidade ejiji ba orgaun legislativu atu kria lei protesaun ba konsumidores hodi proteze husi hahan importasaun hirak ne’ebe tama mai rai laran.
Nia dehan, tenke kria baze legal ida kona ba asuntu ne’e tanba ohin loron Timor oan barak mak mate ho idade sei nurak.
“Tanba sofre moras kronika sira ne’ebe kauza husi hahan importasaun sira ne’ebe kontaminadu ho kimiku no toksin, ne’ebe hau husu atu kria lalais lei ida hodi kontrola hahan ne’ebe tama mai,” da Cruz sujere ba Parlamentu Nasional, iha Dili.
“Agora dadaun Timor oan (feto) ho idade 40 no 60 (mane) 60 mak mate kauza husi hahan ne’ebe sira konsumu loron-loron.”
Alende ne’e, nia sujere, iha lei ne’e tenke ejiji mos estabelesementu laboratorium halo teste ba hahan importasaun no produsaun rai laran ne’ebe sirkula iha merkaduria, nune’e bele asegura hahan ne’ebe komunidade sira konsumu iha nutrisaun no seguru ba saude.
Nia mos sujere, ba Parlamentu Nasional atu haree mos artigu ida iha lei protesaun konsumedores ne’ebe projeita ona, bandu produtu hahan importansaun sira ne’ebe tama mai rai laran ho lingua ne’ebe komunidade la komprende.
“Bandu hahan ne’ebe hakerek ho lingua ne’ebe ita la komprende, ezemplu Cina nia letra ita la komprende e sira tau deit imagen manu aman ida iha kalen, folin baratu tan ita ba sosa e afinal hahan ida ne’e fo fali moras ba ita,” nia hateten.
Iha parte seluk, Membru Parlamentu Nasional, Deputada Josefa Alvares Pereira Soares, hateten Komisaun D asuntu Ekonomia e Dezenvolvimentu projeta ona lei protesaun konsumedores ho numeru 6/III ne’ebe sei ajenda iha plenaria hafoin reseisu hodi diskute no aprova.
Nia dehan, kontiudu projetu lei ne’e diak tebes, tanba sei iha sansaun ba produtor no importador hahan sira ne’ebe laiha kualidade no ladiak ba saude komunidades nian.
“Iha lei ne’e hatuur mos direitu reklamasaun, katak konsumidores sira hetan hahan ne’ebe laiha kualidade no ladiak ba saude, iha direitu atu entrega fila fali no ema ne’ebe fa’an tenke iha kompensasaun ba konsumidores,” nia hateten.
Nia hatutan, bainhira lei vigor ona, parte ezekutador sira tenke haree mos kondisaun liu-liu laboratorium atu bele halo teste ba hahan importasaun hirak ne’ebe tama mai rai laran.