- Publika iha: 01 Outubro 2015
Diretor Jeral Sekretario Estado Politika Formasaun Profesional e Empregu (DJ-SEPFOPE), Jacinto Barros Gusmão, hateten SEPFOPE konsege registu eis funsionario Indonezia hamutuk nain 2068 mak iha problema, tanba naran laiha iha lista pagamentu.
Nia dehan, SEPFOPE fasilita deit halo pagamentu ba benefisiario sira tuir lista aprovado ne’ebe Indonezia fo, maibe ba sira ne’ebe naran laiha lista aprovado, haruka ona ba iha governu Indonezia hodi haree, tanba sira mos iha direitu.
“Ami registu ona no haruka ona ba iha Indonezia,” Diretor Gusmão hateten, iha Kaikoli, Dili.
Alende ne’e, nia dehan, iha ema nain 100 resin mak seidauk foti sira nia osan maske sira nia naran tama iha lista pagamentu nian to’o agora.
Tanba ne’e, nia husu ba benefisiario sira ne’ebe seidauk foti sira nia osan, atu bele foti sira nia osan hodi SEPFOPE bele halo relatorio ba governu Indonezia, nune’e bele prosesu fali sira ne’ebe iha problema.
Entretantu Paulina Borges, eis funsionariu Indonezia ne’ebe naran laiha iha lista pagamentu, ejiji ba governu Indonezia atu prosesa lalais, tanba ne’e sira nia direitu.
“Hau desde pagamentu primeiru kona ba perumahan nian no to’o foin dadaun ne’e, hau nia naran laiha hela deit, ne’ebe hau husu ba estadu Indonezia atu prosesa lalais ami nia direitu ne’e,” Borges ejiji.
Borges ne’ebe uluk servisu iha edifisiu Pemerintah Daerah Tingkat II Dili (agora Administrasaun Munisipal Dili), hateten kuaze funsionarius ne’ebe uluk servisu iha pemerintahan daerah naran laiha iha lista pagamentu.
“Ami lahatene, foti dadus oinsa mak ami nia naran laiha fali iha lista pagamentu ne’e,” nia konfuzaun.
Tanba ne’e nia esperansa, katak estadu Timor-Leste no Indonezia bele servisu hamutuk no prosesa lalais eis funsionariu nain 2068 ne’ebe naran laiha ne’e, atu sira mos bele hetan sira nia direitu hanesan sira seluk ne’ebe simu ona.
