- Publika iha: 24 Junho 2016
Oras ne’e dadaun motor ho kareta hamutuk 3000 mak hala’o operasaun iha rai laran ho ilegalmente e Ministru Interior Longuinhos Monteiro, konsidera sistema kontrolu sei fraku.
Tanba ne’e, Monteiro hateten governu sei halo mudansas ba prosedimentu no sistema fiskalizasaun ne’ebe adekuadu ba sasan sira ne’ebe tama mai Timor.
“Kareta ho motor 3 mill mak tama ho illegal, ne’e segnifika katak buat ruma la’o la los,” Ministru Monteiro hateten, iha nia knar fatin, Dili.
Frakeza bo’ot ne’ebe Timor infrenta mak, nia dehan, wainhira motor ou kareta ida tama mai Timor hatudu deit STNK (Surat Tanda Nomor Kendaraan) haruka bele tama ona.
Tuir nia, lolos tenke iha prosedimentu adekuadu ; hanesan fo deit karta viajen (surat jalan) ne’ebe iha determinasaun tempu, atu nune’e polisia bele kontrolu. “Tempu ne’e hotu mak sira la mai, polisia bele buka ona,” nia hateten.
Tanba nia hateten, iha kazu (ema) balun aluga kareta iha rental Jakarta depois sira mai fa’an fali iha Timor.
“Ema rental la hatene buat ida, hein kareta la fila, registu tiha mak ita foin hatene katak kareta sira ne’e iha hotu Timor,” nia hateten.
Tanba ne’e, nia husu ba Polisia Nasional Republika Indonezia (POLRI) kolabora ho Polisia Nasional Timor-Leste (PNTL) hodi kombate hahalok krimi hirak ne’e.
“Ita tenke intende malu, tenke koopera malu entre rai rua ne’e,” nia sujere.
Iha fatin seluk Membru Parlamentu, Deputadu Arao Noe de Jesus Amaral, rekonese no lolos labele akontese, tanba Timor iha ona lei atu halo prosesu kona ba krimi hirak ne’e.
“Maibe implementasaun lei mak sei fraku,” nia hateten.
Maibe nia konkorda wainhira Ministeriu Interior atu halo mudansa balun ba sistema no prosedimentu ne’ebe durante ne’e la’o la los.
