- Publika iha: 29 Setembro 2016
Seksaun trata Karta Kondusaun (SIM) agoara dadaun menus rekursu humanus e situasaun ida ne’e hamosu funsionariu balun dobru servisu.
Xefe Seksaun Karta Kondusaun Florentina Bento, hateten funsionariu ne’ebe servisu iha seksaun ne’e hamutuk nain 19 deit, enkuantu kliente ne’ebe mai trata sira nia SIM barak tebes.
“Dala ruma kliente sira ne’e hirus ami, tanba ami nia makina emprime ne’e mos prosesu kleur liu, funsionariu ne’ebe servisu iha ne’e mos limitadu los,” Xefe Bento hateten, iha Hera.
Tuir lolos servisu atendementu publiku hanesan ne’e, nia dehan tenke iha funsionariu barak no ekipamentus ne’ebe mais efetivu, hodi nune’e bele prevene komplein husi kliente sira.
“Ami presiza funsionariu liu husi 20, tanba ami lakohi atu ema hein kleur ,” nia hateten.
Alende ne’e, nia dehan governu liu husi Ministeriu Obras Publiku, Transporte e Komunikasaun (MOPTK) trasa ona programas no planu balun hodi solusiona problema hirak ne’e.
“Agora dadaun governu iha ona planu atu hadia situasaun hirak ne’e, ne’ebe ami hein deit,” nia esperansa.
Enkuantu, nia dehan hahu iha tinan 2001 to’o 2016 Diresaun Nasional Transporte e Terestre (DNTT) liu husi seksaun karta kondusaun konsege rezista ona kliente ne’ebe mak hasai SIM hamutuk ema nain 36.503, kompostu hosi karta kondusan Permanente hamutuk nain 24.712 no provizoria hamutuk nain 11.791.
Iha parte seluk Deputada Albina Marcal, hateten rekursu humanu nudar fator determinante ba prosesu servisu ne’ebe susesu.
“Governu presiza tau rekursu humanu ne’ebe sufsiente, tanba sira nia servisu ne’e mos importante,” nia sujere.
