- Publika iha: 30 Janeiro 2012
Dalan a’at iha Vila Nova, Baucau Vila, Distritu Baucau, halo durante tempo udan bee sae a’as halo kareta no motor defisil atu liu maibe tamba nesesidade no opsaun seluk la iha motorista barak inklui, mikrolet ho pasajeiru barak, koko deit sorte.
“Ami nudar kondutor sira koko sorte deit, tamba be’e sae a’as liu ami labele halai hanesan tempo bain loron. Maibe kuando ho kondisaun ne’ebe be sae hanesan ne’e ami tenki koko sorte deit, inklui mikrolet ho pasajeiru ne’ebe barak iha laran ne’ebe hein deit katak sira nia kareta la para iha klaran,” hateten Dinis Boavida iha semana kotuk (16/1) iha Vila Nova Baucau.
Tuir Kondutor Dinis katak Governo presiza tau atensaun ba estrada sira ne’e tanba tinan tinan sira sempre aprova osan barak ba Infraestrutura maibe realidade estrada barak mak kontinua a’at.
“Ami kondutor sira ne’e atu lori mikrolet sira ne’e halai hanesan bain loron ne’e tauk tamba bee sai a’as ami tenki hare mos ba kondisaun estrada,” haten tan kondutor Dinis.
Entertantu Administrador Sub Distritu Baucau, Regina de Sousa, hateten katak parte Sub Administrador halo monitorizasaun no hatama ona proposta ba kompania Japaun mak atu mai halo projecto maibe to’o oras ne’e seidauk realiza.
“Hau hare estrada sira iha Distritu Baucau laran ne’e kuaze a’at hotu, laos ida ne’e deit, maibe sei barak tan ne’ebe nia kondisaun ita hare ba atu kotu deit. Husi Estrada Nasional husi Dili mai to’oiha Distritu Baucau mos nia kondisaun a’at hotu,” hateten tan Administrador Sub-Distritu Baucau Sousa.
Hatan ba kestau ne’e Secretario Komisaun G, Parlamentu Nasional, ne’ebe toma konta ba assuntu Infrastrutura, Deputado Arão De Jesus Amaral hateten katak nia rasik rekonhese kondisaun estrada iha area aat duni.
“Hau mos hare duni kondisaun estrada iha ne’eba, kios ki’ik ida iha ne’eba halo iha saluran ne’ebe tuir los be atu liu kios ida hari netik iha ne’eba no be nalihun duni iha estrada laran prejudika movimentu, liu liu iha tempo udan. Estudante no kareta araska atu liu,” hateten Deputado Amaral.
Tuir mos Deputado ne’e solusaun mak Administrador Distritu bele halo atuasaun, tenki koalia hamutuk ho polisia tranzitu iha local para depois loke dalan ne’e para be bele liu.
“Hau hanoin kios ki’ik oan ida ne’e ita bele sobu tiha para labele prejudika situasaun komunidade nian ne’ebe sirkula ba educasaun nian no transporte ba iha Mercado,” hateten Deputado Amaral.
