- Publika iha: 10 Março 2015
Pontu Fokal Dengue Ministerio Saude, doutor Frederico Bosco, hateten husi Janeiru to’o 12 Fevereiru tinan ne’e (2015) konsege detekta ona moras dengue hamutuk 97 resin, maioria afeta ba labarik.
Nia dehan, kazu dengue tinan ida ne’e registu maka’as iha munisipiu Baucau no Dili ho total kazu hamutuk 97 resin, munisipiu seluk seidauk registu.
“Husi Janeiro to’o dia 12 Fevereiru, relata kazu iha munisipal Baucau hamutuk 43 no Dili iha 54 resin, husi kazu sira ne’e maioria labarik idade 5-14 anos mak sai vitima ba moras dengue,” Doutor Bosco via telephone.
Tuir nia, tinan ida ne’e kazu dengue relata ladun barak kompara ho tinan kotuk, tanba iha tinan kotuk relata kazu hamutuk 679, barak mak mate.
Maske nune’e, nia dehan, Ministerio Saude kontinua esforsu halo sosializasaun ba komunidades, lideransa komunitaria sira kona ba prevensaun ba dengue no fahe mos aimoruk abate ba komunidade balun hodi kontrola vector ne’ebe kauza ba iha moras dengue.
“Ami distribui ona abate ba pesoal saude sira atu fahe ba komunidade sira hodi kontrola vector no entrega mos makina fomigasaun rua ba ospital referral Baucau atu oho vector sira hotu ne’ebe kauza moras dengue,” Bosco hateten.
Iha parte seluk, Xefe Departamentu Saneamentu Munisipio Dili, Domingos dos Santos, hateten moras dengue mosu tanba mos kauza husi lixu ne’ebe naklekar iha sidade laran.
Nia dehan, sira kria meus oioin atu motiva komunidade sira partisipa ativu iha atividade limpeza iha sukus laran, maibe balun la kontribui ba iha ambiente ne’ebe mak moos.
“Tinan ida ne’e osan $30,000 resin sei aloka ba iha sukus sira iha Dili laran, halo atividade limpeza iha sukus,” Santos hateten.
Nia dehan, lixu la’os problem ema ida nian deit, maibe ema hotu nia responsabilidade atu hamoos sira nia uma sorin hodi prevene moras sira ne’ebe kauza husi lixu. *
Entretantu Membru Parlamentu Nasional, Deputadu Manuel Castro, preokupa ho moras ida ne’e tanba perigu tebes ba labarik sira.
“Ami vizita ospital referral Baucau, iha sala emergensia labarik sira nakonu okupa hotu sala koridor sira ho moras dengue no ISPA,” Deputadu Castro hateten.