KORENTIL Sosializa Informasaun Prevensaun Konflitu Ba Foinsa’e

Ekipa Klibur Organizasaun Resistensia Timor –Leste (KORENTIL), sosializa informasaun ba foinsa’e universitario sira kona ba oinsa hasees aan husi konflitu, tanba konflitu la rezolve problemas.

Sekretario Jeral KORENTIL, Jose Monteiro, hateten atividades sosializasaun ida ne’e ho objetivu atu eduka foinsa’e sira oinsa atu hado’ok aan husi influensia ne’ebe bele lori sira ba risku konflitu. 

“Joventude iha nia papel importante atu asegura estabilidade no situasaun tomak, tanba ne’e sira presiza iha konesementu ba dezenvolvementu,” Monteiro hateten, iha servisu fatin Taibesi, Dili. 

Nia mos, husu ba foinsa’e sira atu buka aprende, labele mete konflitu tanba konflitu sei la rezolve problemas.

“Problemas sei lori sira ba prizaun bainhira estraga ema nia sasan, ba ospital kuandu hakanek ema, ou ba semiterio karik mate,” nia dehan. 

Sosializasaun loron ida ne’e, nia dehan, sei koalia kona ba jestaun lideransa, prevensaun konflitu, etika no planeamentu organizasaun nian. 

Nia informa, mos katak dadus konflitu komesa redus ona kompara ho tinan hirak liu ba, tanba sosializasaun ne’ebe sira hala’o iha munisipio hotu, informa foinsa’e sira katak konflitu la’os solusaun ba problemas. 

Koordenador Apoiu Sosiedade Sivil Gabinete Primeiru Ministru, Joaquim da Costa Freitas, motiva foinsa’e sira atu buka kontribui ba dezenvolvementu nasaun nian, liu –liu hametin estabilidade iha rai laran.

 “Oportunidade ba imi barak, bele konsentra iha escola maibe tenke hanoin mos ativiade extra iha liur,” nia hateten. 

Nia husu, mos ba organizasaun sosiedade sivil sira ne’ebe hala’o atividades peace building haree mos ba iha dezenvolvementu ekonomia komunidades nian, tanba parte rua ne’e tenke la’o hamutuk hodi hamate konflitu.   

Entretantu foinsa’e Cadisto Fone, agradese ba KORENTIL ne’ebe fahe ona informasaun ba sira, loke sira nia hanoin no enkoraja sira atu kontribui ba iha dezenvolvementu. 

“Importante tebes ba hau hanesan foinsa’e, hametin hau nia espiritu nasionalismu hodi kontribui ba dezenvolvementu rai ida n e’e,” nia hateten. 

Nia konsidera, foinsa’e sira sai vitima ba iha situasaun no desizaun sira ne’ebe la’o iha rai laran, la’os autor ba konflitu tanba dala barak ho situasaun kampu servisu ne’ebe limitadu, entaun fasil monu ba iha manobra sira.