- Publika iha: 19 Fevereiro 2013
Durante tama tempu udan, hahu Janeiru 2013 to’o agora total labarik ne’ebe rejistu iha Banku Urgensia ho moras dengue hamutuk nain 19.Tuir Xefe Interino Banku de Urgensia, Cosme Saldanha katak labarik hirak ne’e mai husi Distritu Dili no Ermera nain ida ne’ebe ho kondisaun grave.
“Kazu dengue hahu iha fulan kotuk to’o horiseik hamutuk 20, pasiente barak liu mak labarik ki’ik idade 13 mai kraik, e husi numeru ne’e adultu nain ida deit husi bairo Aituri laran ne’ebe sei baixa hela iha ospital,” dehan Xefe Interino Banco De Urgencia (BU), Cosme Saldanha, (06/02) iha knar fatin Bidau,Dili.
Kona ba pasiente ida husi distritu Ermera ne’ebe tama ho kondisaun grave, nia dehan agora nia kondisaun rekopera ona hafoin hetan tratamentu intensive husi pesoal saude sira iha Ospital Nasional Guido Valadares (HNGV).
Iha parte seluk, Diretora Jeral Servisu Autonom Medikamentus e Ekipamentus da Saúde (SAMES), Odete Maria Freitas Belo hateten maske sira laiha aimoruk ba moras dengue maibe reajente atu diagnose moras ne’e sufsiente hela.
“Moras denque laiha virus ida, maibe oinsa ita bele asegura pasiente sira ne’ebe iha ospital ho infusaun, isin manas ita presiza aimoruk hanesan parasetamol no antibiotik ruma atu atende hau hanoin ida ne’e sufsiente tanba ami mos iha reajente ne’ebe sufsente atu halo diagnostika ba moras denque,” dehan Diretora SAMES ne’e.
Entretantu Xefe Unidade Banku de Sangue Nasional (BSN), Arsenio Jose Alves sente preokupa ho kazu dengue ne’ebe afeta maka’as ba labarik sira nia saúde tanba BSN rasik agora dadaun menus stok ran.
“Iha fulan hira ne’e nia laran sira fo ona stok ran trombosit atu ajuda pasiente denque adulto ne’ebe baixa hela iha ospital no labarik nain tolu husi Clinika madre Aimutin sira nian mos tanba afetadu denque,” dehan Xefe BSN ne’e.
