- Publika iha: 14 Outubro 2014
Governu Sao Tome Principe (STP) prontu atu fo apoia ba Timor-Leste, liu-liu iha area justisa nian, hodi loke kooperasaun bilateral iha setor ida ne’e.
Tanba ne’e Ministeriu Negosiu Estrangeiru STP asina ona akordu ho Ministeriu Justisa (MJ) Timor-Leste kona ba planu programa ida ne’e.
Ministru Justisa Timor-Leste Dionisio Soares Babo, hateten ne’e kooperasaun ne’ebe diak entre nasaun rua ne’e, liu-liu iha setor justisa, liu-liu ba sistema de informasaun e teknologia no kapasitasaun.
“Ita hanorin sira iha parte halo konektividade ba sistema informasaun no teknologia ba setor justisa, no ita mos sei haruka ita nia ema atu ba eskola iha sira nia rain,” MJ Babo hateten, iha salaun Ministeriu Negosiu Estrangeirus, Pantai-Kelapa, Dili.
Ministru Babo afirma, STP sei haruka sira nia ema mai atu halo estudu iha Sentru Formasaun Judisiariu Timor-Leste, tanba iha sira nia rain ate agora seidauk iha sentru formasaun ne’e.
“Ne’ebe iha oportunidade ne’e, ita mak sei ajauda sira barak liu,” nia dehan.
Enkuantu Ministra Negosiu Estrangeiru no Kooperasaun (MNEK) STP, Natália Umbelina, agradese tanba Timor-Leste hakarak atu koopera hodi asina akordu ho sira intermus ajuda malu iha aspetu judisiariu.
“Ne’e loke dalan no hanoin ida deit ba solidaridade, amizade kooperasaun ne’ebe diak liu iha future entre Timor-Leste ho Sao Tome,” Ministra Umbelina dehan.
Nia hatutan, Timor-Leste mos iha sentru formasaun judisiariu ne’ebe kapaas, tanba ne’e STP sei haree oinsa mak bele delega sira nia ema mai aprende iha sentru ne’e.
“Ita sei troka esperiensia ba malu, hodi forte liu tan,” nia dehan.