- Publika iha: 05 Setembro 2015
Tribunal Munisipiu Oe-Cusse (TMO) to’o agora sei kontinua uza sistema manual, enkuantu tribunal munisipal seluk uza ona sistema informatiku.
Xefe Ekipa Ba Distritu Counterpart Internasional USAIDid Carolyn Tanner, hateten antes monta sistema informatika iha TMO, ekipa ba distritu sei fo formasaun ba ofisiais justisa sira kona ba oinsa bele utuliza sistema manual hodi halibur estatistika.
“Ami haree iha tribunal Baucau uza ona sistema otomatizasaun ho komputador hodi akumula estatistiku, maibe iha Oe-Cusse sei uza prosesu manual,” Xefe Ekipa Ba Distritu Tanner hateten, iha Tribunal Rekursu, Kaikoli, Dili.
Nia dehan, ida ne’e bazea ba peskiza ne’ebe mak ekipa ba distritu halo iha Tribunal Munisipiu Baucau no Oe-Cusse foin lalais ne’e.
Hatan ba kestaun ne’e Prezidente Tribunal Rekursu (TR), Juis Guilhermino da Silva, rekonese kestaun ne’e, maibe agora dadaun sira esforsu hela, atu tribunal munisipal hotu monta sistema informatika.
“Agora dadaun tribunal Dili komesa halo hela, depois mak ba Suai no Oe-Cusse,” Prezidente TR Silva hateten.
Nia dehan, tribunal hotu tenke uza sistema informatika, tanba uza sistema manual nia kualidade rezultadu estatistika ladun diak.
“Uza prosesu manual ne’e kazu balun ita ladun detekta, maibe sistema informatiku ne’e entrada mos ita hatene, nia final ou pendent mos ita hatene, ita sempre kontrola situasaun ida ne’e,” nia dehan.
