- Publika iha: 27 Outubro 2015
Membru Parlamentu (MP) Nasional, Deputadu Eladio Faculto, sujere ba Ministeriu Komersiu Industria e Ambiente (MKIA), kuda aihoris tenke iha tempu udan, la’os iha bailoron, tanba kuda iha tempu bailoron rezulta aihoris barak mak mate.
Faculto hateten, aihoris barak mak mate durante ne’e tanba governu kuda iha tempu bailoron e mos kontrolasaun minimu liu.
“Sira kuda aihoris la’os iha tempu udan, maibe iha tempu loron manas fali, ne’e ladun efektivu,” Deputadu Faculto hateten.
Tanba ne’e, nia dehan, governu tenke kria politika ne’ebe diak, nune’e bainhira ba kuda aihoris, labele estraga orsamentu.
“Ne’e gasta osan, tanba tinan-tinan ita fo osan ba proteze meu ambiental,” nia hateten. Hatan ba preokupasaun ne’e Vise Ministru Komersiu Industria E Ambiente (MKIA), Filipus Nino Pereira, hateten iha aihoris balun mak bele kuda iha tempu bailoron, maibe sistema atu kuda aihoris ne’e mak haree didiak.
“Kuda tiha aihoris prepara kedas bee, depois loron-loron bee ne’e mak turuk ba aihoris sira ne’e,” Vise Ministru Pereira hateten.
Alende ne’e, nia mos rekonese, katak durante ne’e governu nia kontrolasaun ba aihoris hirak ne’e mak minimu liu, entaun iha aihoris barak mak mate.
“Iha fundus sovensoens publika ne’ebe mak ita apoia ba grupu kuda aihoris sira, tuir lolos sira mak iha responsablidade ba haree ida ne’e,” nia hateten.
Nia promote, sei hadia diak liu tan sistema hodi haforsa kontrolasaun ba ahoris sira ne’ebe mak governu kuda ona.
