- Publika iha: 27 Janeiro 2016
Hafoin susesu akompanha grupo hortikultura hamutuk 12, organizasaun non governmental Hamutuk Ita Ajuda Malu (HIAM) Health apoia tan grupo foun neen iha munisipio Ermera.
Diretora Ezekutivu, HIAM Health, Rosaria Martins da Cruz, hateten atividade ne’e ho objetivu atu hamenus malnutrisaun iha Timor-Leste, liu –liu iha munisipio Ermera, tanba numeru malnutrisaun as iha munisipio Ermera.
“Ami hamutuk ho komunidade implementa to’os komunidade hamutuk 12 iha munisipio Ermera no extende tan ba suku neen seluk, prepara agrikultores hamrik mesak hanesan agrikultor modernu,” Diretora da Cruz hateten, iha Hotel Novo Turismu, Dili.
Antes atu implementa, nia dehan, komunidade sira tenke tuir formasaun durante semana ida iha sentru formasaun HIAM Health kona ba hortikultura liga ba nutrisaun nian, nune’e komunidade sira bele kuda aihoris ne’ebe bele fo nutrisaun diak ba sira nia familia.
Nia hatutan, atividades ne’e hetan suporta finanseiru husi Sunrise Joint Venture, ho objetivu atu eduka komunidade sira no kontribui ba iha redusaun malnutrisaun iha Timor –Leste.
Iha parte seluk, reprezentante doadores Sunrise Joint Venture, Antonio dos Santos, apresia ho rezultado ne’ebe parseirus implementador sira hatudu, tanba iha grupo sira ne’e barak mak hamrik mesak ona no iha ona sustentabilidade.
“Programa ne’e diak tebes, apoia komunidade sira implementa to’os komunidade no familia, e ami apoia sira nafatin hodi akompanha komunidade sira,” nia hateten.
Entretantu Diretor Nasional Saude Komunitaria, Carlito Freitas Correia, apresia ho esforsu organizasaun HIAM Health ne’ebe kontribui ona ba iha redusaun malnutrisaun liu husi eduka komunidades kona ba kuda aihan ne’ebe iha nutrisaun.
“Apresia ho sira nia esforsu durante ne’e apoiu ministro eduka komunidade, familia sira kuda aihan ne’ebe iha valor nutrisaun,” nia apresia.
