- Publika iha: 20 Outubro 2016
Governu liu husi Ministeriu Obras Publiku, Transportes e Komunikasaun (MOPTK) lori airin eletrisidade ba iha suku Fatumean munisipiu Suai atu monta eletrisidade iha ne'eba, maibe abandona tiha deit.
Membru Parlamentu Francisco Andrade, hateten komunidade kuaze uma kain30 resin iha suku ne'e to'o agora seidauk asesu ba eletrisidade e durante ne'e sira uja deit lampu tradisional bainhira kalan.
“Iha 2012 sira lori airin eletrisidade tama ba suku ne’e maibe sira la monta ahi” nia kestiona.
Nia dehan, governu presiza iha planu ne’ebe adekuadu, iha asaun ne'ebe serteza atu nune’e halo povu labele lakon konfiansa ba servisu governu nian.
“Ita bele konsidera attitude ne’e hanesan bosok povu deit, lori ekipamentus sira ne’e ba bou iha ne'eba la halo buat ida,” nia lamenta.
Hatan ba kestaun ne’e I Vise Ministru Obras Publiku, Transporte e Komunikasaun (MOPTK) Januario da Costa Pereira hateten lakunas hirak ne’e sai mos preokupasaun governu nian no iha hela prosesu nia laran atu hadia.
“Ita hadia hela no buat sira ne’e presiza tempu no neneik-neneik sei rezolvido,” nia hateten.
