- Publika iha: 26 Agosto 2014
Eskola Ensino Baziku Central Farol, oras ne’e dadaun infrenta problemas falta salas ba aulas inklui meja no kadeiras nian e situasaun ida ne’e fo impaktu ba efetividades prosesu aprendizajen ba alunus sira.
Maske nune’e, Xefe Gat Ensino Baziku Central Farol, Elias dos Reis, kona ba kondisaun eskola sira ladun preokupa, maibe karteiras ne’e importante tebes ba sira.
“Ami nia sala ida deit mak meja no kadeiras seidauk kompletu, tanba ami nia alunus sira balun la tur iha kdeira,” Xefe dos Reis hateten, iha Farol Dili.
Nia dehan, kestaun ne’e sira hato’o bebeik ona ba Ministeriu Edukasaun (ME) hodi aumenta meja no kadeiras 30 ba sira nia eskola, tanba estudantes barak liu.
Iha fatin hanesan professora Gracinda de Jesus, hateten prosesu aprendizajen kontinua la’o maske falta salas de aulas inklui karteiras.
“Kada tinan numeru alunus aumenta bei-beik, total alunus hamutuk 2109, kada sala ami tau alunus 60 ka 70 ba leten ,” Pofessora de Jesus hateten.
Nia mos husu ba Ministeriu Edukasaun buka meus oinsa para hamenus estudante sira iha sala ida ema nain 25 ka 30 deit, nune’e bele iha efetividade iha prosesu aprendizajen.
“Tanba ami hanorin ba sira ne’e, sira ladun fokus ba materia ne’ebe ami hanorin ba sira,” nia hateten.
Entretantu Diretor Jeral Servisu Kooperativu, Antonino Pirez, hateten problemas falta salas de aulas, la’os deit eskola Farol, maibe kuaze Timor laran tomak infrenta problema hanesan.
“Planu halo ona atu rehabilita eskola iha Timor laran tomak ,” nia dehan.
Kona ba hamenus estudantes iha kada sala, nia dehan, dadaun ne’e Ministeiru Edukasaun buka hela meus oinsa mak bele tau 20 to’o 25 alunus kada salas.
“Eskola Farol, hau hanoin tinan oin mai bele rehabilita, tanba ami mos iha planu atu rehabilita eskolas iha Timor laran tomak,” Pirez dehan.
