- Publika iha: 02 Dezembro 2015
Diretor Jeral Servisu Kooperativus Ministeriu Edukasaun (ME), Antoninho Pires, hateten ministeriu kontinua menus inspector atu halo inspesaun ba eskola-eskola sira ne’ebe estabelese ona iha teritoriu tomak.
Nia hateten, total inspector inspesaun ne’ebe dadaun ne’e iha hamutuk nain 64, enkuantu eskola ne’ebe iha kuaze atus ba atus, tanba ne’e eskola balun seidauk halo inspesaun to’o agora.
“Hanesan iha Aileu, eskola iha 60 maibe inspector inspesaun nain ida deit, entaun nia atu kobre hotu eskola sira ne’e ho tempu badak ne’e imposible,” Diretor Pires hateten, iha Dili.
Tuir lolos, nia dehan, kada postu administrativu no munisipiu iha inspector inspesaun nain ida.
Maibe, nia hateten, servisu inspesaun kontinua la’o diak e espera katak tinan oin bele aumenta tan rekursu humanus iha parte ida ne’e nian.
Iha parte seluk Deputadu Jorge Teme, hateten ne’e problema ne’ebe mak governu tenke rezolve, tanba sira nia papel ne’e importante tebes halo inspesaun ba eskola hirak ne’ebe iha.
“Iha Ermera, sira husu tanba saida mak inspector inspesaun sira la visita eskola sira iha ne’e,” Deputadu Teme haktuir.