- Publika iha: 17 Novembro 2014
Prezidente Asosiasaun Feto Ermera, Maria da Costa Exposto, hateten feto distritu Eremera preparado ona atu partisipa iha programa pre-deskonsentrasaun ne'ebe V governu Konstituional hili distritu Ermera sai pilotu.
Nia haktuir, sira sei esforsu maka'as prepara an atu partisipa iha planu programa ne'e liu -liu iha nivel foti desizaun nian tanba feto mos iha kapasidade atu lidera.
Nia hatutan nudar sidadaun prontu konstribui ba iha politika V governu konstitusional nian liu -liu programa pre-deskonsentrasaun no municipio nune'e bele lori moris diak ba povu tomak liu -liu feto sira iha area rural.
"Se nomeasaun ne'e tun, hau sei apply no prontu atu asume responsabilidade tomak nune'e ajuda promove feto maluk sira bele tur ona iha nivel sira tuir mai, liu -liu asembleia municipio," Prezidente Asosiasaun Feto Ermera Exposto hateten, iha Fundasaun Oriente Dili.
Nia dehan, feto sira tenke prontu intermus kapasidade, kualidade atu kompete iha programa hotu ne'ebe governu inisia labele hein kouta tanba ida ne'e sei la akontese iha futuru.
"Karik struktura estabelese ba jestor distrital nudar feto ami Ermera mos buka atu kompete ami lakohi mane sira fo prioridade ba ami maibe buka atu kompete tanba feto mos iha kapasidade atu tur iha nivel sira foti desizaun," nia dehan.
Nia hateten, feto sira ne'ebe hola parte iha programa ne'e tenke lori isu no aspirasaun feto nian hodi halo influensia hodi hetan atensaun ne'ebe diak ba feto maluk sira iha area rural.
Iha parte seluk, reprejentante feto vokal distritu Ermera, Maria Santina da Costa Tilman, hateten nudar sidadaun prontu atu kontribui ba iha dezenvolvementu pais nian, maibe depende ba lideransa partidu sira atu fo konfiansa.
"Hau nia an prontu maibe depende ba ema ne'ebe fo fiar mai hau atu kompete iha programa ida ne'e," nia dehan.
Nia mos agradese ba sosiedade sivil sira ne'ebe prepara ona sira atu kompete ho mane sira iha programa pre-deskonsentrasaun no municipio ne'ebe implementa dadauk ona iha distritu tolu.
Entretantu Sekretario Estado Desentralizasaun Administrativa, Tomas do Rosario Cabral, hateten hili distritu tolu ne’e sai pilotu atu haree nia implementasaun tanba besik capital fasil atu kontrola mos orsamentu sira.
Nia hatutan, oras ne’e dadaun prosesu la'o hela ba rekrutamentu jestor distrital,l tanba desizaun Konselho Ministru rekrutamentu jestor la'o hotu iha 12 distritus, distritu tolu mak sai pilotu.
“Jestor ne’e la'os ami mak rekruta maibe grupo tekniku permanente distrital mak rekruta no mai iha nasional foin hato’o ba iha konselho ministru,” nia dehan.
