- Publika iha: 21 Novembro 2014
Organizasaun CAUCUS fo kapasitasaun ba reprejentante feto partido politiku husi distritu Aileu, Ermera no Lequisa hodi partisipa iha eleisaun municipio tinan 2016.
Diretora Ezekutivu CAUCUS, Paula Corte Real, hateten kapasitasaun ba feto Partidus Politiku focus ba distritu tolu ne’e, tanba governu hili distritu tolu ne’e sai hanesan pilotu ba implementasaun municipio.
Nia dehan, formasaun ne'e ho objetivu atu hasa’e konesementu feto vocal sira partidu nian atu bele kompete mos ho mane sira iha eleisaun municipio liu-liu nivel foti desizaun.
“Hasa’e sira nia konesementu liu –liu kona ba jestaun lideransa, transformasaun konflitu, knaar asembleia publiku, metodu debates no seluk tan,” Diretora Caucus Corte Real hateten, iha salaun Fundasaun Oriente Dili.
Nia hatutan, metodu formasaun ne’e iha teoria ne’ebe fo husi fasilitadora sira nune’e mos partisipante sira sei halo pratika kona ba debates tanba iha asembleia municipio sei barak liu mak debates.
Nia hatutan, formasaun sei kontinua iha tempu oin mai ho materia ne’ebe diferente liu –liu tekniku kampania no public speeking atu sira bele iha kuinesementu baziku ba kampanha.
Treinamentu loron rua ne’e (9-10 fulan Otubro) hetan partisipasaun husi reprejentante feto Partido Demokratiku, Fretelin, CNTR, PSD no Frente Mudansa
Iha parte seluk, reprejentante Sekretaria Estado Promosaun Igualidade (SEPI), Filomena Babo, husu ba partisipantes sira atu aproveita oportunidade ne’e kapasita an hodi kontribui ba iha prosesu dezenvolvementu.
“Tenke aproveita atu espresa saida mak ita hakarak no hanoin atu bele kontribui ba iha dezenvolviemntu feto labele nonok deit, se nonok ema labele hatene feto sira nia hakarak no presiza,” Babo sujere.
Entretantu reprejentante feto Partido Congresu Nasional Rekonstrusaun de Timor (CNRT) distritu Ermera, Maria Santina da Costa Tilman, agradese ba CAUCUS ne’ebe fasilita ona formasaun ba sira hodi partisipa iha programa pre-deskonsentrasaun ne’ebe governu planu ona.
Nia haktuir nudar feto sira prontu ona atu partisipa iha programa ida ne’e maibe depende ba iha lideransa partidu sira.
“Depende ba ema ne’ebe fo fiar mai hau atu kompete iha tempu ida ne’e,” nia dehan.
