- Publika iha: 15 Janeiro 2015
Grupo Feto Parlamentar Timor-Leste (GMPTL) konsidera feto sira iha area rural seidauk sente dezenvolvementu ne’ebe durante ne’e la’o iha rai laran.
Prezidente GMPTL, Deputada Josefa Alvares Pereira Soares, hateten povu iha area rural liu –liu inan feto sira la sente benefisiu husi orsamentu jeral do estado ne’ebe kada tinan parlamentu aprova.
Nia haktuir, halo dialogu ho feto area rural atu rona ezekusaun orsamentu jeral do estado ne’ebe kada tinan parlamentu aprova no haree besik situasaun moris feto sira iha area rural.
“Ita bo’ot sira haree rasik sidade Dili ne’e fila ba mai mak ita deut hela deit, sira iha area rural halerik ba aimoruk, medikus, maternidade, eskola kondisaun at, estrada ladiak,”Deputada Soares preokupa, iha Parlamentu Nasional.
Sukus rua mak membrus GMPTL sira vizita iha dialogu ne’e mak, nia dehan, hanesan suku Fatubolu iha distritu Ermera, sub-distritu Soibada, distritu Manatuto no suku Dato Tolu, iha distritu Covalima, suku hirak ne’e izoladu liu.
Tanba ne’e GMPTL husu ba governu atu toma konsiderasaum mos ba povu sira iha area rural, liu –liu inan feto sira.
Preokupasaun hanesan hato’o mos husi komunidade Bauguia, Zelia da Silva, katak iha area rural sira seidauk sente dezenvolvementu, tanba seidauk asesu ba nesesidade baziku sira.
“Ami seidauk asesu ba bee moos, eletrisidade nune’e mos postu saude,” nia kestiona.
Nia hatutan, sira sempre uja aimoruk tradisional hodi kura moras sira hanesan isin manas, mear no seluk tan inklui mos partus iha uma deit ho ajuda husi daya sira.
“Tanba distansia ba fasilidade saude do’ok kuaze kilometru 5 resin, entaun ami tenke hela iha uma ne’ebe mak besik.”
Tuir dadus Demography Health Survey 2009-2010, hatudu katak 67,9% inan sira asesu ba fasilidade saude bainhira isin rua no partus kuaze 78% mak la ba iha fasilidade saude partus iha uma deit, iha 19% mak partus apoiu husi daya, 61% mak partus ajuda husi membru familia no iha 1,5% partus mesak la hetan apoiu.
