- Publika iha: 09 Fevereiro 2016
Tribunal Munisipal Dili (TMD) hala’o julgamentu ba kazu krimi integridade simples ho forma violensia domestika, ne’ebe involve arguido TR ne’ebe baku lezada BC, tanba hakarak lori oan ba hotu foho.
Tuir akuzasaun Ministeriu Publiku ne’ebe lee sai husi juis prezidente, katak iha lokraik tuku lima lezada husu lisensa ba arguido atu ba foho no iha altura ne’eba arguido hatan ; lezada bele ba lori ho sira nia oan ne’ebe ki’ik deit, enkuantu oan primeiru no segundu hela.
Maibe lezada ulun to’os, hakarak atu lori hotu nia oan sira ba foho, tanba lezada dezafia arguido sei la tau matan ho diak ba labarik sira, ho ida ne’e lezada atu lori hotu.
Haksesuk malu ida ne’e halo arguido komesa tensaun ona, hodi dudu lezada no hasai hotu lezada no labarik sira nia ropa husi pasta no kansela lezada labele ba foho, iha altura ne’eba lezada koalia maka’as ba arguido, entaun tanba nervosu arguido basa no tuku lezada iha kotuk laran.
Hafoin lee sai akuzasaun hirak ne’e, Juis Prezidente husu ba arguido atu hili koalia ou nonok, maibe arguido hili koalia hodi rekonese saida mak arguido halo ba lezada, tanba lezada lakohi rona saida mak arguido koalia.
“Hau hakarak nia ba, maibe labele lori labarik hotu, balun ba balun hela, maibe nia ulun toos duni,” Arguido hateten iha audensia julgamentu.
Maske nune’e, durante prosesu ne’e la’o hela iha tribunal, arguido no lezada dame malu ona no agora dadaun hela hamutuk iha uma ida.
Nia mos arepende ba hahalok ne’ebe mak nia halo ba vitima no prometa atu la repete tan aktu hanesan iha future.
Hafoin rona tiha deklarasaun husi arguido, juis prezidente deside fo pena suspensaun tinan ida ba arguido, no kada semana-semana ba polisia hodi halo relatoriu.
