- Publika iha: 29 Julho 2016
Argoido (MG) ho nervosu baku lezada (MS) iha fatin publiku, tanba deskonfia lezada halo adolteiro ho mane seluk.
Tuir akuzasuan husi Ministerio Publiku ne’ebe lee sai husi juis prezidente, katak iha data 23/11/2015, tuku lima lokraik wainhira lezada hein hela bemo atu fila ba uma, derepenti arguido hodi motor para kedas iha lezada nia oin hodi husu “nusa mak hau telephone o la hit,” e foin lezada atu hatan, arguido basa lezada nia hasan no tuku lezada iha uluk fatuk.
Tanba attitude ne’e akontese iha fatin publiku, entaun lezada nia kolega sira haree ho matan hodi ba kesar kedas polisia ne’ebe iha altura ne’eba besik hela fatin akontesementu.
Hafoin lee sai akuzasaun hirak ne’e, juis prezidente husu ba arguido hili koalia ou nonok, maibe arguido hili atu nonok hodi prova katak akuzasaun hirak ne’e los hotu.
Iha tempu hanesan juis prezidente husu mos ba lezada atu hili koalia ou nonok maibe lezada hili koalia ba tribunal katak, sira nain foin tuir malu (namora).
“Ami nain rua foin namora hela, nia baku hau tanba iha ema balun posting fali hau nia foto oin-oin, ne’e mak nia hirus hau no deskonfia hau,” nia hateten.
Maske nune’e, nia hateten, agora dadaun sira nain rua diak malu ona, enkuantu arguido agora dadaun eskola hela no lezada servisu iha loja.
Entretantu defensor publik ne’ebe halo defeza ba arguido husu ba tribunal atu fo pena ne’ebe natoon, tanba arguido foin involve krimi dala ida no komete krimi ne’ebe ho natureza krimi ofensas integridade simples, no iha momentu hanesan arguido mos rekonese nia salan no promete sei la repete tan.
Hafoin rona deklarasaun hirak ne’e juis prezident deside fo pena suspensaun tinan ida ba arguido.
