- Publika iha: 17 Julho 2014
Diretora organizasaun Hamutuk Ita Ajuda Malu (HIAM) Health (HH), Rosaria Martins da Cruz,rejeita maka’as informasaun husi Ministeriu Saude ne’ebe dehan, governu suporta finanseira ba nia organizasaun hodi kombate mal nutrisaun.
Nia hateten, desde HH loke sentru rehabilitasaun ba mal nutrisaun iha tinan 2010 to’o agora, seidauk simu fundus husi Ministerio Saude. “Durante ne’e ami hetan deit suporta husi organizasuan internasional sira,” Diretora HH ne’e hateten, iha Timor Plaza, Dili.
Nia haktuir, nudar parseiru sira iha koperasaun servisu ho Ministerio Saude kona ba redusaun mal nutrisaun liu husi hasa’e konesementu komunidade sira nian.
Nia rekonese, katak iha tinan 2010 -2011 sira hetan duni apoia husi governu liu husi fundu sosiedade sivil no gabinete Prezidente da Republika liu husi programa kombate pobreza.
Diretora HH ne’e, hatutan kada tinan sira hatama proposta ba iha Ministerio Saude, Ministerio Agrikultura, fundu sosiedade sivil, hodi hetan fundus, maibe laiha rezultadu.
“Karik programa mal nutrisaun la’os prioridade governu nian,” nia hateten.
Pasiente mal nutrisaun ne’ebe oras ne’e dadaun hela iha Sentru Rehabilitasaun, nia hateten, hamutuk nain 25 hodi rekopera hela sira nia kondisaun.
Antes ne’e, Diretor Nasional Saude Publiku Ministerio Saude, Carlito Soares, hateten kada tinan MS aloka fundus ba sentru rehabilitasaun mal nutrisaun HH nian.
Nia dehan, tinan ida ne’e seidauk fo apoia, tanba sei halo analiza ba MoU ne’ebe iha atu programa sira ne’e la’o kondis ho politika V Governu Konstitusional nian.
“Ba HIAM Health kada tinan ita apoia orsamentu ba sira,” nia dehan.
Fundus ne’ebe MS fo ne’e, nia hateten, atu bele tau matan ba labarik mal nutrisaun sira ne’ebe hela iha sentru rehabilitasaun HH nian hodi hetan rekoperasaun ba sira nia kondisaun.
“Montante hira kada tinan, hau la hatene klaru,” Diretor Soares hateten.