HIAM Health Apoiu Tan Grupo Hortikultura Foun Nen

Hafoin susesu akompanha grupo hortikultura hamutuk 12, organizasaun non governmental Hamutuk Ita Ajuda Malu (HIAM) Health apoiu tan grupo foun neen iha munisipiu Ermera.

Diretora ezekutivu, HIAM Health, Rosaria Martins da Cruz hateten atividade ne’e ho objetivu atu hamenus malnutrisaun iha Timor-Leste liu –liu iha munisipio Ermera tanba numeru malnutrisaun as iha munisipio Ermera. 

“Progresu iha ami hamutuk ho komunidade implementa to’os komunidade hamutuk 12 iha munisipio Ermera no extende tan ba suku nen seluk hodi prepara agrikultor sira hamrik mesak hanesan agrikultor modernu,” hateten Diretora da Cruz iha Hotel Novo Turismu, Dili. 

Nia hatutan antes atu implementa komunidade sira tenke tuir formasaun durante semana ida iha sentru formasaun HIAM Health kona ba hortikultura liga ba nutrisaun nune’e komunidade sir abele kuda aihoris ne’ebe bele fo nutrisaun diak ba sira nia familia. 

Nia hatutan liu atividade ne’e hetan supporta finanseirus husi Sunrise Joint Venture ho objetivu atu eduka komunidade sira no kontribui ba iha redusaun malnutrisaun iha Timor –Leste. 

Iha parte seluk, reprezentante doadores Sunrise Joint Venture, Antonio dos Santos apresia ho rezultado ne’ebe parseirus implementador sira hatudu tanba iha grupo sira ne’e barak mak hamrik mesak ona no iha ona sustentabilidade. 

“Ami hare programa ne’e diak tebes atu apoiu komunidade sira implementa to’os komunidade no familia entau ami foti desizaun apoiu sira nafatin atu akompania komunidade sira,” hateten nia. 

Entertantu, Diretur Nasional saude Komunitaria, Carlito Freitas Correia hateten apresia ho esforsu organizasaun HIAM Health ne’ebe kontribui ona ba iha redusaun malnutrisaun liu husi eduka komunidade sira kona ba kuda aihan n’eebe iha nutrisaun.

“Apresia ho sira nia esforsu durante ne’e apoiu ministro eduka komunidade, familia sira kuda aihan ne’ebe iha valor nutrisaun,” hateten nia.