- Publika iha: 14 Abril 2014
Sekretario Estado Politika Formasaun Profesional e Empregu (SEPFOPE), Ilidio Ximenes da Costa, informa iha Janeiru tinan ida ne’e trabalhadores iha Korea do Sul konsege haruka $1,7 miloens ba familia atu dezenvolve ekonomia uma laran.
Nia hateten, laiha funsionario ida mak haruka osan ho montante $27,000 ba inan aman, so uniku trabalhador sira iha Korea du Sul deit.
Tanba ne’e nia dehan, SEPFOPE haruka ema sai ba Korea, la’os ba nar-naran deit maibe ba hetan osan no matenek husi ema nasaun dezenvolvidu sira.
“Osan sira ne’e, liu-liu distritu Ermera nian balun uja ba halo lia mate no moris, maibe iha balun mos halo uma, eskola no seluk tan atu hadia ekonomia familia nian,” SE da Costa hateten, iha Balide, Dili.
Husi dadus ne’ebe Banku Nasional Ultramarinu (BNU) fo sai, katak trabalhador sira ne’ebe kada tinan haruka osan ba familia maioria trabalhador feto, tanba ne’e ba futuru presiza fo liu atensaun ba feto, tanba sira mos bele buka osan.
Entretantu Sekretaria Estado ba Promosaun Igualidade (SEPI), Idelta Maria Rodrigues, hateten maioria trabalhador feto sira mak haruka osan ba familia, tanba normalmente feto mak jere ekonomia, la’os mane.
“Feto hatene liu halo jestaun duke mane,” SE Rodrigues gava.
Iha parte seluk, Inan Esperansa Gaspar, ne’ebe nia oan mos ba servisu iha Korea du Sul, hateten nia oan haruka osan ba sira depende familia husu hira.
“Sira la haruka osan arbiru, tanba haruka mai dehan koa maka’as, entaun haruka bainhira ami husu hodi selu nia alin sira nia eskola no halo buat ruma,” nia hateten.