- Publika iha: 12 Junho 2014
Iha peskiza NGO Judicial System Monitoring Program durante tinan rua nia laran iha baze, deskobre katak komunidade barak mak seidauk iha konesementu kona ba servisu Defensor Publiku (DP) nian.
Diretor Ezekutivu Judicial System Monitoring Program (JSMP), Luis Oliveira Sampaio, hateten realidade ida ne’e hatudu, bainhira komunidade sira iha problema, sira hato’o fali keixa iha Parlamentu Nasional.
“Lolos sira buka advogadu professional sira ou defensoria publiku hodi reprezenta sira atu buka soluasaun ba sira nia kazu,” Diretor Ezekutivu JSMP, Sampaio hateten, iha Colmera, Dili.
Buat hirak ne’e akontese, tuir nia, tanba sosializasaun ne’ebe durante ne’e governu liu husi Ministeriu Justisa halo ba iha komunidade sira, seidauk profunda.
Kona ba kestaun ne’e, Primeira Dama, Isabel Fereira, husu ba advogadu sira tenke toma inisiativa, oinsa foti medidas.
“Ba netik iha baze, halo enkontru ruma ho populasuan sira hodi fahe informasaun, kona ba prosesu atu hetan justisa ne’e oinsa,” Primeira Dama Fereira hateten.
Hatan ba preokuapsaun ne’e Prezidente Defensor Publiku, Sergio Hornai, katak preokupasaun hirak ne’e iha duni valor positive, oinsa bele eleva knar no servisu DP nian ho diak liu.
“Defensoria publika no advogadu privadu nia papel mak servisu eskluzivamente atu bele presta asistensia ne’ebe diak ba ita nia sidadaun sira hotu,” Hornai esplika.
