- Publika iha: 22 Agosto 2014
Iha tinan 2015, governu liu husi Sekretariadu Estadu Komunikasaun Sosial sei estabelese ajensia notisioza Timor-Leste, nune’e bele kontribui ba prosesu dezenvolvementu iha rai laran.
Sekretariu Estadu ba Komunikasaun Sosial (SEKOMS), Nelio Isaac Sarmento, hateten hahu agora presiza halo preparasaun, buka referensia husi nasaun seluk, liu-liu Indonezia ne’ebe implementa agensia notisia, haree vizaun no misaun.
“Ita hahu halo seminario ida ne’e, ita rona esperiensia balun husi Portugal no Indonezia, hodi hatene sira ninia prosesu harii ajensia to’o agora sei ejisti,” SE Sarmento hateten, iha Hotel Timor, Dili.
Nia dehan, difikuldade ne’ebe sira hasoru, sai sasukat ida ba Timor-Leste bainhira implementa ajensia notisia iha 2015.
Tuir nia, ajensia notisia la’os deit atu fo informasaun relasiona ho situasaun rai laran no dezenvolvementu ba povu sira, maibe bele sai mos marketing ida atu atrai investor sira mai investe iha Timor –Leste.
Nia dehan, maske la ansi maibe prezia duni estabelese, atu ema hotu liu –liu mundu internasional sira bele hatene situasaun atual no dezenvolvementu ne’ebe la’o hela iha Timor-Leste.
“Kondisaun agora ita merese duni atu estabelese ajensia notisia, tanba ita atu adere ba ASEAN no CPLP,” nia hateten.
Nia dehan, durante ne’e ema sira iha ASEAN no iha Guine Bissau, Angola sira rasik la hatene Timor –Leste, tanba publikasaun media iha deit nasional.
“Entaun ho ajensia bele ajuda ita nia media nasional sira publika informasaun kona ba Timor –Leste,” SE Sarmento hateten.
Entretantu Diretor Ezekutivu Agensia Notisia Indonezia, Rahmat Nasution Dahlan, hateten Timor-Leste merese ona atu estabelese agensia notisia ne’e hodi responde ba nesesidade nasaun nian rasik.
“Tanba Timor –Leste sei adere ba iha ASEAN no hola parte ona iha mundu internasional hanesan mos nasaun seluk, liu –liu atu ema hotu bele hatene dezenvolvementu Timor –Leste iha setor hotu,” nia dehan.
Nia fo agradese ba governu Timor –Leste, tanba involve ona sira iha forum ne’e hodi fahe sira nia esperiensia no prontu atu servisu hamutuk ho ajensia notisia Timor –Leste bainhira estabelese hodi publika informasaun sira.
“Ami agradese no ami prontu atu servisu hamutuk ho agensia notisia Timor –Leste,” Dahlan agradese.
Maske nune’e, nia dehan, presiza prepara rekursu humanu ne’ebe diak no professional, tanba ema sira ne’ebe servisu iha ajensia ne’e tenke jornalista profesional.
Iha parte seluk, Jornalista Senior nudar mos nain ba Jornal Timor Post, Rosa Garcia, hateten Timor –Leste presiza duni estabelese ajensia notisia, maibe la’os agora.
“Saida mak ita halo agora mak presiza tuur hamutuk, halo diskusaun maka’as hodi haree didiak objetivu no prepara rekursu humanu,” Garcia sujere.
Alende ne’e, nia mos dehan, estabelesementu ajensia notisia ida ne’e sei fo ameasas ba media nasional sira, tanba jornalista sira bele halai hotu.
“Tanba governu iha osan atu selu jornalista sira ho salariu ne’ebe bo’ot,” nia dehan.
