- Publika iha: 22 Agosto 2014
Universidade Nasional Timor Lorosa’e (UNTL) organiza konferensia internasional kona ba “produsaun konesementu sientifiku iha Timor –Leste, hodi dezemina informasaun siensia no rezultado peskiza ne’ebe matenek nain sira halo ona durante ne’e.
Vise Reitor asuntu Pos-Graduasaun e Peskiza UNTL, Francisco Miguel Martins, hateten konferensia ne’e importante tebes atu matenek nain sira fahe hanoin kona ba sientifika inklui mos hanesan oportunidade ida ba peskizador sira atu hato’o sira nia rezultado peskiza ne’ebe halo ona durante ne’e.
“Atu ema akademiku no intelektuais sira bele fo sira nia hanoin, hodi kontribui ba prosesu dezenvolvementu pais ninian,” Vise Martins hateten, iha salaun Auditorio UNTL, Dili.
Tuir nia, dezenvolvementu sei la la’o, bainhira akademika laiha investigasaun kona ba sientifico no rezultadu peskiza ne’ebe halo ba governante sira.
Konferensia durante loron tolu ne’e (13-15 Agustu 2014), nia dehan, iha tematiku 10 mak peskizador no matenek nain sira aprezenta, mak hanesan humanitarian, ekonomia, social, politika, engenaria, agrikultura, edukasaun no seluk tan.
Entrentantu Ministru Edukasaun, Bendito Freitas, hateten konferensia ne’e importante tebes atu haree no dezenvolve diak liu tan estrutura sientifiku iha future, tanba universidade sira nia papel mos determinante tebes iha evolusaun siensia ne’e rasik.
Tanba ne’e, nia husu ba UNTL nudar uniku universitario publiku atu hatudu kapasidade investigasaun no peskiza ida kualidade.
“Tenke hatudu duni kapasidade de investigasaun no peskiza hodi produs resultadu ne’ebe diak iha area siensia,” Ministru Freitas sujere.
Nia hatutan, siensia iha Timor –Leste dezenvolve ona, maibe sei iha frakeza oituan,liu-liu iha parte orientasaun presiza haree.
Iha parte seluk, Peskizador no atual dosente UNTL, Flaviano Soares, agradese tebes tanba liu husi konferensia ne’e bele aprezenta rezultado peskiza ne’ebe sira halo ona durante ne’e.
Iha oportunidade ne’e nia sei aprejenta rezultado peskiza no analiza kona ba progresu hakiak fahi local no nia sustentabilidade inklui mos nutrisaun.
“Seminario internasional sira hanesan ne’e ba futuru bele halo beibeik, la’os deit UNTL, maibe se deit instituisaun superior sira inklui mos governu bele halo mos,” Peskizador Soares hateten.
Konferensia loron tolu ne’e hetan apoiu finanseiru husi governu no supporta husi Kompania Timor –Telecom, Sapo TL, The Dili Weekly no Sylvia Printing Dili.
