- Publika iha: 14 Outubro 2014
Atu garantia independente no kualidade informasaun ba publiku, Timor –Leste sei kria orgaun regulador ida hodi regula atividade orgaun komunikasaun social (media) iha rai laran tuir projektu lei haruka.
Sekretario Estado ba Komunikasaun Sosial (SEKOMS), Nelio Isaac Sarmento, hateten instituisaun entidade reguladora ne’e sei regula atividade komunikasaun social bazeia ba lei ne’ebe iha hodi garante kualidade informasaun iha publiku.
“Hau hatene katak laiha lei ida mak atu bandu servisu komunikasaun sosial, maibe importante proteje sira lori lia los ba populasan pais ida nian atu komprende lolos informasaun,” SE Sarmento hateten hafoin halo enseramentu III Enkontru Plataforma Entidade Regulador Pais Lingua Portugues, Iha Hotel Timor, Dili.
Nia hatutan, entidade reguladora ne’e atu haree servisu orgaun komunikasaun sosial atividade hotu la’o tuir matadalan ne’ebe iha, tanba agora tama ona era globalizasaun ne’ebe avansadu tebes.
Iha III Enkontru PER ne’e Timor–Leste assume kargu hanesan presidente ba entidade plataforma reguladora pais teritorio Portugues ba periodu 2014-2015.
SE Sarmento hatutan, iha enkontru ne’e pais (komunidade Paizes da Lingua Portuguesa) hotu konkorda atu haforsa instituisaun PER ne’e rasik, halo baze dadus ba orguan komunikasaun iha pais ida–idak inklui mos estudu komparativu no kapasitasaun iha area lingua no jurista nian.
“Ami konkorda troka esperensia entre Timoroan ne’ebe hasai jurist iha area komunikasaun ho pais CPLP nian,” nia dehan.
Iha parte seluk, membru Komisaun A Parlamentar, Deputadu Antonino Bianco hateten objetivu estado hodi kria instituisaun regulador no leis sira ne’e, mak atu asegura orgaun komunikasaun sira bele lao diak liu tan intermus kualidade hodi kompete ho rai seluk.
“Tanba ita nia jornalista agora dadaun iha rai laran deit,” Deputadu Bianco hateten.
Nia hateten, inisiativa estadu kria instituisaun ida ne’e mak atu proteje jornalista no orgaun komunikasaun social iha rai laran no ema hotu ne’ebe asesu ba informasaun.
Entretantu Jornalista Paulino Quintas, hateten importante duni ba Timor-Leste nudar nasaun foun presiza regula, maibe la’os ba buat hotu.
“Sira regulador ne’e la’os atu mai regula buat hotu, maibe fo pasu ida atu ema hotu bele la’o tuir dalan livremente no ho responsabilidade, ne’e mak importante,” nia hateten.
Hanesan nasaun demokratiku, nia dehan, kria lei no instituisaun reguladora ba orgaun komunikasaun sosial la signifika hamate liberdade imprensa, tanba liberdade imprensa ne’e meus ida media sira iha atu espresa ulun bo’ot no komunidade sira nia hanoin hodi kontribui ba dezenvolvementu.
“Ita espera katak laos mai atu regulariza fali ita maibe atu hametin sistema ne’ebe iha,” nia esperansa.
