- Publika iha: 12 Setembro 2015
Membru Parlamentu (MP) Nasional, Deputadu Adriano do Nascimento, ejiji ba governu atu hatudu kontratu no Bill Of Quantity (BOQ) ba projetu konstrusaun Aero Portu Suai nian ba publiku, nune’e sira mos bele akompanha prosesu ne’ebe iha.
Tuir nia, kontrusaun aero portu ne’e laiha kualidade tanba la ke’e no aterru deit, entaun aviaun ki’ik deit mak bele tuun iha aero portu ne’e, bo’ot labele.
“Buat ne’e seriu tebes, tanba ne’e hau husu kontratu no BOQ ba projetu ne’e,” Deputado Nascimento ejiji, iha plenaria Parlamentu Nasional.
Nia hateten, orsamentu konstrusaun ba projetu ne’e ho montante $68 miloens, la inklui konstrusaun uma ba komunidades ne’ebe afetadu husi projetu ne’e.
Nia mos, husu ba ekipa inspesaun sira atu tun ba iha baze hodi haree dezenvolvimentu projetu ne’e, tanba gasta osan bo’ot maibe nia konstrusaun laiha kualidade.
Hatan ba kestaun ne’e, Vise Ministru Obras Publica, Transporte e Komunikasaun (MOPTK), Inacio Moreira, rejeita fo komentario klaru kona ba ida ne’e tanba dezenho, BOQ aprovado no kontratu asina ona iha governasaun antes.
“Dezenho, BOQ aprovado no kontratu asina ona antes hau tama,” nia hateten.
Tanba ne’e, nia dehan, governu kontinua projetu ne’e hodi la’o tuir BOQ ne’ebe iha ona, nune’e labele implika ba iha orsamentu ne’ebe aprova ona.
