- Publika iha: 05 Novembro 2015
Membru Parlamentu (MP) Nasional, Deputada Ilda Maria da Conceicao, hateten atu Timor –Leste (TL) bele adere ba ASEAN, governu tenke hadia uluk kondisaun rai laran, duke halo loby ho nasaun sira.
Tanba tuir nia, rekursu humanus Timor nian seidauk sufsiente hodi TL atu adere ba ASEAN.“Ita nia rekursu humanus seiduak kualifikadu, ita bele koalia tun sa’e, maibe ita nia rai laran ne’e ita la fo atensaun, ne’e hanesan deit,” Deputada Conceicao hateten, iha Parlamentu Nasional.
Nia hatutan, sai estadu membru (ASEAN) konserteza ema barak sei mai Timor hodi buka servisu, sekuandu Timor nia rekursu humanus limitadu, entaun ema husi rai seluk mak sei domina.
“Tanba ema sira ne’e mai ho kualifikadu hotu, depois ita nia ema sira ne’e atu tau iha ne’ebe,” nia kestiona.
Tanba ne’e, nia sujere, ba governu hadia uluk kondisaun rai laran, antes Timor adere ba ASEAN.
Enkuantu Ministru Negosiu Estrangeiru no Kooperasaun (MNEK), Hernani Coelho, hateten prosesu TL tama ba ASEAN iha ona faze final asesmentu husi working group ne’ebe halo iha tinan kotuk, hodi haree kona ba Timor nia preparasaun atu adere ba ASEAN.
“Sira mai halo ona avaliasaun kona ba politika no seguransa hotu ona, sira sei halo tan avaliasaun kona ba ekonomia nian, hafoin ne’e mak ita haree fali oinsa ba future,” Ministru Colheo hateten.
Maibe, nia dehan, Timor nafatin optimista ho esforsu tomak hodi bele adere ba ASEAN.
Kona ba governu tenke hadia uluk rai laran intermus rekursu umanu, Ministru colheo hateten agora dadaun Timor esforsu hela oinsa atu nafatin dudu estudante sira, no hadia kualidade edukasaun.
