- Publika iha: 29 Junho 2016
Membru Parlamentu (MP), Deputada Maria Lurdes Bessa, husu ba governu liu husi Ministerio Obras Publiku, Transportes e Komunikasaun (MOPTK) atu toma responsabilidade ho urgentemente halo moru protesaun ba mota bo’ot iha suku gisu ne’ebe kada udan bo’ot sempre lori hotu komunidade nia rai potensial (bokur) sira.
Nia hateten, kuandu tempu udan bee mota ne’e sempre provoka estragus barak, tinan ba tinan mota ne’e lori rai produtivu barak, barajen no estrutura irigasaun inklui moru iha mota ninin naksobu hotu.
“Komunidade nia toos lubuk ida mak mota lori ona, e sira tauk kuandu governu la tau atensaun, mota ne’e bele lori mos komunidade sira nia uma,” nia hateten.
Iha suku Gisu, postu administrative Maubara, munisipiu Liquisa ne’e, nia hateten iha aldeia lima ou hitu mak afeitadu husi mota ne’e.
Nia rekonese mos, katak iha tinan hirak liu ba governu konsege monta ona moru protesaun maibe tanba laiha kualidade entaun udan mai no mota lori hotu moru hirak ne’e.
Hatan ba preokupasaun ne’e Ministru Obras Publiku, Transportes no Komunikasaun (MOPTK), Gastao Sousa, hateten situasaun hanesan ne’e la’os akontese deit iha suku Gisu, maibe mos iha Natarbora e governu aponta hela hodi buka nia solusaun.
“Ami sei toma nota iha ne’e oinsa mak ami bele responde situsaun ida ne’e,” nia hateten.
Tuir nia, governu labele foti solusaun halo moru protesaun hotu, tanba sei gasta osan barak no posibilidade atu responde ba kestaun ne’e ki’ik liu.
“Iha situasaun balun ita bele halo, maibe ita tenke haree ba nia ameasas,” nia dehan.
