- Publika iha: 07 Março 2014
United Nations Office on Drugs and Crime (UNO-DC) husi Estadus Unidus da Amerika (EUA) fo ajudus kareta landcruiser tolu ba Unidade Polisia Fronteira, hodi fasilita sira nia servisu iha baze ho diak liu tan.
Country Manager UNO-DC, Troels Vester, hateten kareta tolu ne’e oferese ba Unidade Polisia Fronteira (UPF), atu fasilita sira nia servisu halo patrulamentu iha fronteiras.
“Servisu iha fronteira sei la la’o ho efetivu wainhira laiha transporte ne’ebe adekuadu,” Country Manager Vester hateten, iha Kuartel Jeral PNTL, Kaikoli, Dili.
Nia espera, katak kareta hirak ne’e bele ajuda sira hala’o sira nia servisu ho diak no susesu liu tan.
Iha lidun seluk Assisten Komandante Unidade Polisia Fronteira (UPF), Superintendente John Pires, hateten apoia ida ne’e fo liu husi asina Memorandum of Understanding (MoU) ne’ebe asina tiha entre Komando ho UNO-DC iha fulan Setembru 2012.
“Sira fo kareta tolu no komputador 13, e sira mos fo ami treinamentu kona ba trafiku humanu,” Assisten Komandante UPF ne’e hateten.
Nia dehan, kareta hirak ne’e sei fahe ba postu tolu ne’ebe iha ona, kada postu ida sei hetan kareta ida.
Entretantu membru Komisaun B (negosiu estranjeirus, seguransa no defeza), Deputadu Cesar Valente de Jesus, hateten ne’e koperasaun servisu ne’ebe diak, entre PNTL ho doadores internasional.
“Saida deit maka ita simu, ne’e iha duni nia valor ba eleva servisu ne’ebe ita hala’o, ne’e duni husu ba UPF sira atu bele utiliza kareta sira ne’e ho diak,” Deputadu de Jesus sujere.
Nia mos husu ba governu atu prepara mos orsamentu hodi halo manutensaun ba kareta ne’e, karik at.