- Publika iha: 01 Dezembro 2014
Komandante Polisia distritu Lautem, Superintendente Marcos Sequiera Nunes, hateten Polisia Distritu Lautem to’o agora sei nafatin kontinua menus farda, Mesmu kada tinan aprovasaun orsamentu hodi sosa farda ba Polisia Nasional Timor-Leste sempre iha.
Komandante Nunes, hateten dala barak polisia sira uja farda ne’ebe nakles, hodi partisipa iha reniaun nivel distrital.
“Hau nian rasik mos nakles, e komunidade sira mos kestiona polisia hatais at,” Komandante Nunes hateten, iha Dili.m
Tanba ne'e husu ba governu atu toma responsabilidade ba kestaun ne’e, tanba polisia nia dignidade mos bazea ba maneira hatais ropa.
“Intrega ba desizaun politika sira atu hare ba kestuan ne’e tanba planu ne’e governu mak halo,” Komandante ne’e afrma.
Nia rekunhese katak iha 2013 Polisia nasional Timor-Leste iha Distritu Lautem simu duni farda maibe kada membru ida simu deit farda ida.
“Ne’e uja deit khusus ba tuir seremonia boot sira,” dehan Komandante nunes.
Enkuantu total membru Polisia Nasional Timor-Leste iha Distritu Lautem ho total 140.
Hatan ba kestaun ne’e II komandante Afonsu de Jesus, katak iha ona planu atusosa tan farda foun, no agora iha hela prosesu tenderizaun.
“Ekipa ida husi SES ninian ba ona iha Indonezia hodi kontinua kolia ho komphania sira atu halo MOU ida hodi determina kualidade farda PNTL nian,” Komisariu de Jesus hateten.
Iha fatin seluk Membru Komisaun B (seguransa, defeza, negosiu estrangeirus), Deputadu Cesar Valente, hateten farda sai hanesan problema ne’ebe dala barak komandante distritu sira levanta wainhira Komisaun B ba halo fiskalizasaun.
“Balun dehan laiha kualidade, balun dehan menus farda,” dehan Deputadu Cesar.
Tanba ne’e nia espera Governu bele resolve kestaun ne’e, nune’e Polisia sira bele uja farda ne’ebe dignu hodi halo sira nia servisu ho diak.
