- Publika iha: 15 Janeiro 2015
Servisu Investigasuan Kriminal (SIK) husu ba governu atu sosa ekipamentus, liu-lliu teste DNA nian, nune’e prosesu teste DNA bele hala’o mos iha rai laran.
Komandante SIK, Superintendente Ludgerio Lay, hateten durante ne’e bainhira atu halo teste DNA ruma, governu haruka deit ba Indonezia, Singapura, Malaysia no India.
“Ita bele halo ida ne’e, maibe ekipamentus mak laiha,” Komandante Lay sujere, iha Dili.
Nia dehan, husi Komando Jeral Polisia Nasional Tinmor-Leste (PNTL) halo ona pedidu kona ba kestaun ne’e, maibe depende ba governu, tanba ne’e kompetensia governu nian.
“PNTL iha laboratoriu mini ne’ebe hanesan sidik jari polisia bele halo iha ne’e, maibe buat seluk seidauk bele tanba laiha ekipamentus,liu-liu teste DNA nian,” nia hateten.
Iha sorin seluk membru Komisaun F (saude, edukasaun, kultura, veteranus no igualdade jeneru), Deputadu Eladio Faculto, husu ba governu tenke hola ekipamentus ba Polisia Servisu Investigasaun Kriminal (SIK) hanesan test DNA, no test sasan sira ne’ebe tama illegal iha nasaun laran.
“Ekipamentus teste DNA ne’e importante tebes, tanba ita nia ruin restu mortais saudoso barak mak seidauk halo test DNA, tanba laiha ekipamentus kona baida ne’e nian iha rai laran,” nia hateten.
Nia dehan, ruin restu mortais sira nian balun mak agora rai hela iha mortuariu Ospital Nasional Guido Valadares hodi hein haruka ba iha India halo teste DNA iha ne’eba.
“Komentari tinan barak ona, maibe laiha rezultadu, ne’e dehan komentariu mamuk deit,” nia kritika.
Iha parte seluk Diretor Fundasaun Mahein (FM), Nelson Belo, hateten presiza duni SIK iha ekipamentus sira hanesan ne’e, nune’e bele hafasil sira nia servisu iha baze.
“Durante ne’e ekipamentus hanesan halo teste DNA no test ba sasan kroat sira SIK seidauk iha,” nia dehan.
Tanba ne’e, nia dehan, SIK labele halo investigasaun klean ba kazu bo’ot ruma, tanba laiha ekipamentus kompletu. “Buat ne’ebe iha mos ita seidauk bele halo los, agora hanoin tan kria buat foun,” nia kestiona.
