Embaixada Amerika Fornese Motor Ba PNTL

Embaixada Amerika iha Timor-Leste fornese motor hamutuk 15 ba Polisia Nasional Timor-Leste (PNTL), hodi suporta servisu membru polisia sira.

Adjuntu Komandante Polisia Nasional Timor-Leste (PNTL), Komisariu Afonso de Jesus, hateten Embaixada Amerika fo ona ajudus barak mai iha PNTL, no iha tinan ida ne’e fo tan motor no ekipamentus balun atu detekta droga.

“Fasilidade sira ne’e uja atu halo’o servisu, ajuda membru sira nia servisu iha baze,” Adjuntu Komandante De Jesus hateten, iha nia knar fatin, Kaikoli, Dili.

Iha tinan kotuk, nia dehan embaixada Amerika mos oferese treinamentu ba membrus Unidade Polisia Fronteira (UPF), hasa’e sira nia konesementu kona ba droga no oinsa atu atua situasaun sira ne’e.

“Kona ba kontrola droga, ne’e la’os issu nasional deit maibe issu global,” Adjuntu de Jesus hateten.

Durante ne’e nia dehan, relasaun no kooperasaun servisu entre PNTL no Embaixada Amerika diak tebes no agradese ba ajudus ne’ebe sira sempre fo ba PNTL.

Iha fatin seluk Deputadu Virgilio da Costa Hornai, hateten Embaixada Amerika fo apoia ba PNTL bebeik ona, depende ba PNTL sira oinsa mak utiliza fasilidade sira ne’e ho diak no fasilita sira nia servisu iha baze ho profisional.

“Fasilidade sira ne’e atu uja hodi dezemvolve instituisaun forsa liu tan ba future,” Deputadu Hornai hateten.

Nia espera, katak kooperasaun servisu ne’e kontinua no Timor –Leste mos presija proteze relasaun diak ida ne’e.