- Publika iha: 07 Outubro 2015
Vise Diretor Fundasaun Mahein (FM), Joao Almeida Fernandes, husu ba Polisia Komunitaria (POLKOM) atu kria baze legal no mata dalan ida ba servisu Konselho Polisiamentu Komunitaria (KPK) hodi define lolos sira nia servisu iha baze.
Tuir nia, POLKOM to’o agora seidauk kria matan dalan ida atu define klaru kona ba servisu KPK nian iha baze.
“Sira presiza mata dalan ida atu identifika saida mak sira bele halo, no saida mak sira labele halo,” Vise Diretor FM Fenandes sujere, iha Dili.
Tanba nia dehan, Polisia Komunitaria fo kompetensia ba KPK atu rezolve problema iha suku laran, maibe presiza define klaru kazu oinsa mak sira bele rezolve.
“Hanesan kazu violensia domestika, sira labele rezolve tanba ne’e krimi publiku no tenke lori ba tribunal,” nia hateten.
Iha parte seluk Membru Komisaun B (seguransa, defeza no negosiu estrangeirus), Duarte Nunes, aseita hanoin FM nian, atu POLKOM kria mata dalan ida ba servisu KPK nian.
“Atu nune’e sira bele hatene sira nia servisu no servisu bazeia ba matadalan ne’ebe iha,” Deputadu Nunes hateten.
Hatan ba kestaun ne’e II Komandante POLKOM, Inspector Xefe Helena das Dores, hateten agora dadaun komando iha ona planu atu kria duni mata dalan ida ba KPK.
“Ami sei kria mata dalan ida, ne’e iha hela planu nia laran,” Komandante das Dores hateten.
Maibe, nia dehan, ida ne’e so Komando Jeral Polisia Nasional Timor –Leste (PNTL) mak iha kompetensia atu deside kona ba bainhira atu halo mata dalan ne’e.
