- Publika iha: 24 Junho 2016
Membru Parlamentu, Deputada Angelina da Costa, lamentavel ho rekursu humanus iha eskuadra polisia iha postu administrativu Atauru ne’ebe sei menus, maske kada tinan governu halo rekrutamentu ba membrus foun.
Nia dehan, total membru polisia ne’ebe deslokadu hamutuk nain sia, nain lima fahe ba suku no nain hat deit mak iha eskuadra, no dala ruma sira ne’e halo servisu dobradu, tanba laiha rekursu humanus.
“Presiza aumenta tan membru polisia iha ne’eba,” Deputada da Costa sujere, iha Parlamentu Naisonal.
Lolos ne’e situasaun hanesan ne’e, nia dehan labele akontese, tanba kada tinan sempre halo rekrutamentu ba membru polisia foun sira.
“Membru foun ne’ebe mak rekruta kada tinan ne’e ba ne’ebe?” nia pergunta.
Enkuantu total membru Polisia Nasional Timor-Leste (PNTL) agora dadaun hamutuk nain 3812.
Hatan ba preokupasaun ne’e, Segundu Komadante Jeral PNTL, Komisariu Faustino da Costa, rekonese kestaun ne’e, tanba ne’e PNTL sei esforsu hodi hamenus durasaun tempu formasaun hodi kada tinan bele halo rekrutamentu dala rua.
“Tinan ida ami tenta atu hamenus ba seis mezes ou nove mezes,” Komisariu da Costa hateten.
Nia mos konsidera, katak durante ne’e iha duni membru balun halo dupla servisu tanba menus rekursu humanus.
“Ami hakarak ami nia membru ne’e barak, atu nune’e labele dupla funsaun,” nia dehan.
