- Publika iha: 25 Agosto 2011
Negosiante Roda 3 ne’ebe durante ne’e fa’an sasan iha tasi ibun Palasiu Governu oin, lamenta ho desizaun ne’ebe fo sai husi Administrasaun Distritu Dili,atu hamamuk tasi ibun durante fulan Agustu tanba iha ema estranjeiru barak sei mai vizita Timor iha fulan ne’e.
Bernardinho Xavier Freitas, negosiante R3 ne’ebe lor-loron fa’an nia sasan iha fatin ne’e lamenta tanba governu la fo informasaun antes ba sira.
“Se ami la fa’an durante fulan ida tomak, entaun lor-loron ami han saida,”lamenta Bernardinho Xavier Freitas semana kotuk iha Plasiu Govenru oin.
Tuir nia, governu tenke identifika ba sira durante fulan Augustu nune’e sir abele kontinua faan no bele hetan osan hodi sustenta familia.
“Ami loron ida de’it mak la fa’an, ami senti rugi sa’tan fulan ida tomak oinsa mak ami bele hetan osan,”nia preokupa.
Preokupasaun hanesan mai husi negosiante Jacinto Gusmao, katak informasaun ne’ebe fo sai husi Administrasaun Dili ne’e urjenti liu.
“Se hanesan ne’e antes ne’e fo samada atensaun ba ami karik ami bele ba buka fatin seluk hodi fa’an maibe ida ne’e derpente deit haruka ami sai,“Jacinto dehan.
Entretantu membru Polisia Maritima ne’ebe lakohi publika nia identitas hateten, la’os sira nia hakarak atu muda sai vendedor sira husi fatin ne’eba maibe sira hala’o deit orden.
“Ami hala’o deit orden ne’ebe ami simu husi komando jeral ne’ebe hetan autorizasaun husi Administarsaun Dili katak, durante fulan Agustu negosiante sira tenke hamamuk tasi ibun husi Palasiu Govenru oin to’o Bidau-Lesidere, sira so bele fa’an tuku 05:00 loraik ba leten,”dehan fonts konfrimadu ne’e.
Tuir fonts ne’e, katak negosiante sira labele fa’an iha fatin ne’eba, tanba durate fulan Agustu iha vizita barak husi ema estranjeiru.
Enkuantu bainhira jornalista tenta konfirma asuntu ne’e ba iha Administardor Distritu Dili, Ruben Braz de Carvalho maibe lakonsege tanba laiha fatin.
