- Publika iha: 11 Julho 2011
Feto na’in 6 husi Distritu Oe-Cusse organiza aan hodi harii Grupu Haburas Soru Tais Tradisional Oe-Cusse (HASTTOC) ho objetivu atu mantein kultura soru tais husi distrit Oe-Cusse nian.
“Hanesan avo sira husi Oe-Cusse sira la hatene hakerek no lee, sira nia servisu mak homan ho soru tais tanba ne’e mak ami nia grupu ne’e harii atu kaer metin kultura timor no adat istiadat avo sira nia liu –liu husi distritu Oe-Cusse,” hateten Kordenadora grupu HASTTOC, Apolonia Marques Hendrique, semaa kotuk iha Bairo-Pite, Dili.
Alende atu kultura soru tais labele lakon, liu husi atividade ne’e membru sir abele suporta sira nia moris lor-loron nian.
Grupu ne’e rasik harii iha 1994, ho nia membru mesak feto faluk sira ne’ebe laiha servisu no la eskola.
“Hau loke grupu ki’ik ida ne’e hanesan lapangan kerja ba sira, ajuda feto maluk sira e bainhira sira soru tais hotu ha’u selu kedas, selu tuir selendang ne’ebe ema sosa,” nia katak.
Membru nain 6 ne’e lor-loron tenke soru tais, maibe karik iha order barak, sei aumenta ema nune’e bele halo hotu lais pesanan ne’e, “kuandu laiha ami na’in 6 ne’e deit,” Apolonia dehan tan.
Tuir nia, antes ne’e sira laiha fatin atu fa’an sira nia tais, maibe agora sira ona fatin permanente ne’ebe ajuda husi governu liu husi Ministeriu Justisa. “Iha 28 Novembru tinan kotuk ami hasouru direitamente ho Sr.Prezidente e prezidente hasai karta ida ba Ministeriu Justisa, liu-liu ba diresaun rai no propridade, sira fo rain iha Mandarin mai ami atu halo uma hodi fa’an ami nia tais, ami kontente,”nia katak.
Entertantu membru HASTTOC, Domingas Bobo hateten soru tais ne’e hanesan servisu ida ne’ebe han tempu kleur.
“Ha’u hakarak involve iha Grupu ne’e tanba iha ami nia Oe-cusse ami feto sira nia servisu mak soru tais tanba ne’e mak hau hakarak servisu soru tais maske servisu ne’e todan maibe hau hakarak tanba liu husi soru tais ita bele hetan osan,”nia hateten.
Tanba ne’e nia parte husu ba Ministeriu Turismu Komersiu e Industria (MTCI) atu tau matan ba grupu HASTTOC, liu-liu bainhira iha espozisaun ruma bolu sira atu sira mos bele partisipa. “E ami mos husu atu fo treinamentu kona-ba oinsa bele soru tais ho kualidade ne’ebe diak, liu-liu kabas nia koor labele sai,” nia husu.