- Publika iha: 07 Fevereiro 2013
Ministeriu Saude kansela tiha prosesu tenderizasaun ba planu atu sosa ambulansia 19, e desizaun ida ne’e hamosu lamentasoens husi membru Komisaun F Parlamentar tanba orsamentu preve tiha ona.Tuir Membru Komisaun F ne’ebe trata asuntu Saude, Edukasaun no Igualidade Jeneru ne’e katak orsamentu $4 milioens husi Orsamentu Jeral Estadu 2012 nian mak aprova tiha ona hodi sosa ambulansia 19 tanba kuaze Sentru Saude hotu iha teritoriu tomak falta ambulansia.
“Hau rasik kestiona problema ida ne’e tanba komisaun F rasik mak hatama proposta hodi aprova osan atu sosa ambulansia, lolos ministeriu labele kansela orsamentu ne’e ba planu seluk,” lamenta Deputada Ilda Maria da Conçeicão, (01/02), iha Parlamentu Nasional.
Hatan ba asuntu ne’e Ministru Saúde, Sergio Lobo katak nia parte kansel tiha planu atu sosa ambulansia 19 ne’e tanba ambulansia la’os solusaun atu resolve problema iha Sentru Saude sira.
“Ambulansia la’os solusaun, solusaun mak haforsa servisu saúde iha populasaun nia le’et, ita kompara deit diak liu haruka medikus sira ba hare ema sira iha sukus ka haruka ema sira iha sukus ida –idak mai iha nasional,” dehan Ministru Lobo.
Nia dehan, durante ne’e ambulansia iha maibe nia jastaun mak la diak katak utiliza la tuir nia servisu tanba ne’e diak liu haforsa servisu saúde iha baze.
Kona ba kareta ambulansia neen ne’ebe apoia husi governu Cina, tuir planu sei halo sirkulasaun deit iha Dili tanba kondisaun (roda badak) la premite para atu uza iha distritu.