- Publika iha: 18 Fevereiro 2013
Diresaun Nasional Saude Komunitaria konsege detekta inan nain 50 resin mak hetan moras vistula tanba bainhira partus la ho asistensia husi Pesoal Saude sira.“Ita bele dehan numeru ne’ebe as, e ami halo ona sosializasaun, advokasia ba iha distritus kona ba moras ne’e, ami mos tun direitamente ba iha inan sira ne’ebe sofre moras ne’e iha sira nia uma hodi enkoraja sira atu lori mai iha ospital nasional guido valadares atu halo operasaun,” dehan Diretora Nasional Saude Komunitaria, Isabel Maria Gomes, (30/01), iha Hotel Timor, Dili.
Diretora ne’e esplika, moras vistula mak moras ida ne’ebe akontese ba inan feton sira ne’ebe partus iha uma la ho fasilidade saúde no la akompania husi pesoal saúde treinado sira (medikus, parteiras) e ikus mai labarik nia moris fatin nakles tanba obriga an.
“Labarik nia moris fatin nakles hamutuk ho foer sai fatin ida deit no fo impaktu bo’ot ba inan feto sira nia moris tanba ema hotu sei hakribi sira inklui mos sira nia la’en no oan rasik,”esplika Diretora ne’e.
Atu prevene moras ida ne’e, nia dehan Ministeriu Saúde liu husi Servisu Integradu Saúde Komunitaria (SISKA) enkoraja ba inan isin rua sira atu konsulta rutina ba sira nia saúde no tenke partu iha fasilidade saúde nune’e bele prevene moras at ne’e.
Husi dadus ne’ebe iha hahu husi tinan 2005 to’o 2012 iha ona inan 50 resin mak afeta moras nee e husi numeru ne’e nain 30 resin mak halo ona operasaun hodi hadia fali sira nia orgaun reprodutiva husi mediku espesialista vistula husi Banglades.
Entretantu Suandina da Silva, nudar inan ida husu ba Ministeriu Saude liu –liu Pesoal Saúde sira atu halo sosializasaun, advokasia ida ba komunidade sira kona ba impaktu no prevensaun ba moras ida ne’e nune’e komunidade sira iha konesementu kona ba moras ne’e.
“Hau hanoin edukasaun ba promosaun mak tenke hametin liu tan liu –liu iha area remotas tanba hau deit mos laiha konesementu ne’ebe klean kona ba moras ida ne’e oinsa bele asesu ba tratamentu,” sujere Inan da Silva.