Parpol 25 Prontu Kompete Iha Elisaun Jeral 2017

Partidus Politiku (Parpol) hamutuk 25 mak registradu iha Comisaun Nasional ba Elisaun (CNE) no prontu atu kompete iha elisaun jeral tinan 2017 ne’e.

Prezidente Comisaun Nasional das Elisoens (CNE) Alcino Barris, hateten. Husi partidu politiku ne’ebe sei konkore iha elisaun ne’e, iha partidu foun hat.

“Iha partidus 25 mak iha kondisaun atu konkore, maibe numeru ida ne’e sei tuun tan kuandu prosesu ne’e la’o ona,” Barris hateten, iha Dili.

Iha inisiu, nia dehan partidus ne’ebe registradu iha CNE hamutuk 29, maibe agora hela 25 parpol, tanba partidus balun halo ona koaligasaun antes elisaun.

Enkuantu prezidente da republika Taur Matan Ruak promulga ona iha dia 16 Janeiru 2017 katak elisaun prezidensial I volta sei hala’o iha dia 20 Marsu 2017.

Entaun, nia hateten kandidatura sira bele hahu halo inskrisaun hodi bele konkore iha elisaun prezidensial.

Nia informa, iha elisaun jeral 2001 total partidu ne’ebe kompete hamutuk 12, 2007 partidu 14, 2012 partidu 21.

Iha parte seluk Membru Parlamentu (MP) Albina Marçal, hateten partidus 25 ne’e kategoria barak ona, maibe ida ne’e mak demokrasia no alende ne’e lei mos fo dalan.

“Ne’e demokrasia, maibe desizaun iha povu nia liman,” nia dehan.

Iha parte seluk komunidade Manuel Henrique, hateten partidus bele barak maibe importante mak tenke asegura seguransa durante pesta demokrasia ne’e la’o.

“Tenke lori povu ne’e ba moris diak, no tenke garantia labele akontese instabilidade iha rai laran,” nia hateten.