- Publika iha: 04 Julho 2012
Organizasaun Nasoens Unidas (ONU) liu husi Reprezentante especial Interinu Sekretariu Jeral ONU nian iha Timor-Leste, Finn Rieske Nielsen, entrega material eleisaun Parlamentar nian ba Sekretariadu Tekniku Administrasaun Eleisaun (STAE).“Ami fo material eleisaun nian, kompostu husi tinta ne’ebe labele hamos butir rihun lima, kamizola rihun rua ba obsevador nasional, no kolete (jas) rihun rua ba observador internasional, kolete rihun rua ba ofisial eleisaun nian, poster ba edukasaun votante no kuadru anunsiu nian,” hateten UN Electoral Support Chief Technical Advisor, Andres Del Castillo, (19/06), iha Kaikoli, Dili.
Tuir nia, apoiu logistiku no operasional ne’e fornese liu husi ekipa konjunta husi Misaun Nasoens Unidas iha Timor-Leste (UNMIT), ho fundus husi Japaun, Suesia, Norwegia no Irlandia.
“Espera katak ho material hirak ne’e bele ajuda servisu STAE nian durante eleisaun Parlamentar bele la’o ho susesu,” dehan Xefe Teknikal Advisor Castillo.
Entertantu Diretor Jeral STAE Tomas Cabral, hateten apoiu hirak ne’e ho objetivu atu bele kria prosesu eleisaun bele la’o ho diak no susesu.
“Durante ne’e STAE ho ONU iha relasaun diak, ho objetivu ida deit, atu hala’o eleisaun ne’ebe transparansia no imparsial,” dehan Diretor Cabral.
Tuir nia, kuandu prosesu eleisaun iha rai laran la’o diak hotu, Timor-Leste bele sai ezemplu ba nasaun sira seluk iha mundu, liu-liu iha Asia.