- Publika iha: 04 Julho 2012
Ema deskonesidu les pamfletu husi Partidus Politiku balun iha fatin balun, e polisia iha dever atu atende problema hirak ne’e.“Husi parte hau nian seidauk hetan informasaun ne’ebe maka klaru kona ba kestaun ne’e, maibe konserteza Komando Distrital ida-idak iha responsabilidade atu responde ba kestaun ne’e,” dehan Segundu Komandante Jeral Polisia Nasional Timor-Leste (PNTL), Afonso de Jesus, (19/06), iha Kaikoli, Dili.
Partidus Politiku (Parpol) hirak ne’ebe ema estraga sira nia pamfletu mak hanesan Partidu Kmanek Haburas Unidade Nasional Timor Oan (KHUNTO) iha Distritu Liquisa no Partidu Demokratiika (PD) iha Distritu Aileu.
Tuir Komisariu, Kommando Distrital sira iha konsensu moral ida atu responde direitamente kona ba situasaun ne’ebe maka akuntese iha sira nia Distritu.
Entertantu Xefe Departementu Informasaun Publiku Sekretariadu Tekniku Administrasaun Eleitoral (STAE), Saturnino Exposto Babo, dehan atu labele akontese hahalok hanesan ne’e, presiza fo edukasaun sivika ba iha komunidade sira.
“Hau hanoin, buat ne’e akontese tanba falta de edukasaun sivika, ne’e duni komunidade bele hatene kona ba oinsa bele respeitu ema nia direitu iha sistema demokrasia ne’e,” dehan Xefe Babo.
Tuir nia, STAE rasik seidauk bele foti asaun, tanba seidauk hetan keixa maibe importante make ma hotu tenke respeitu malu.