- Publika iha: 10 Julho 2012
Hafoin Tribunal Distrital Dili (TDD) hamonu sentensa pena prizaun tinan lima ba arguidu Lucia Lobato, arguidu liu husi nia Defeza halo rekursu ba iha Tribunal Rekursu (TR).
“Nia defensor duni maka mai hatama rekurs iha tribunal, ne’e duni ami sei lori ba Ministeriu Publiku atu resposta,” dehan Offisiais Justisa TDD, Julio Nunes, (04/07), iha Mandarin, Dili.
Nia hatutan, rekursu ne’e rasik hatama iha TDD iha 29 Junu no TDD sei fo tempu ba ministeriu publiku atu fo reasaun ba rekursu ne’e.
“Ami fo tempu to’o 17 Juli ba Ministeriu Publiku atu fo resposta, kuandu laiha resposta, entaun 18 no 19 Julhu prosesu ami lori ba Tribunal Rekursu, atu halo tan julgamentu,” dehan Offisial Nunes.
Entertantu Deputada Josefa Alvares Soares hateten, ida ne’e normal ba se’e deit maka senti la satisfeitu ba desizaun tribunal nian,bele halo rekursu.
“Se nia senti katak sentensa ne’e todan liu ba nia, se nia hatene katak nia salah ne’e kma’an hela, maibe fo desizaun hanesan ne’e entaun nia bele halo rekursu,” dehan Deputada Soares.
Nia hatutan, to’o iha TR mos, sei rona tan reklamasaun husi ema lubuk ida tan, atu nune’e bele foti desizaun ne’ebe maka diak.
