- Publika iha: 26 Janeiro 2017
Komando Jeral Polisia Nasional Timor-Leste (PNTL) sei hatuun 2800 personil polisia hodi fo seguransa ba iha prosesu elisaun jeral tinan 2017 ne’e.
Segundu Komandante Jeral PNTL, Komisariu Faustino da Costa, hateten sira hahu identifika ona fatin votasaun sira liu-liu iha area rural ne’ebe susar atu asesu ba transporte, antisipa antes.
“Sira presiza fo informasaun mai ami, hodi ami bele antisipa no asegura seguransa,” nia hateten, iha Dili.
Nia hateten, iha mos preparasaun seluk, mak hahu halo koordenasaun ho Comisaun Nasional das Elisoens ho Sekretariadu Teknika Administrasaun Eleitoral hodi fo formasaun ba Ofisiais Polisia Suku (OPS) sira.
Nia dehan, komando hatama ona proposta ba governu atu kria kondisaun no fasilidade ba polisia sira ne’ebe mak sei hala’o servisu iha baze.
“Farda sira barak, kalsadu, ekipamentus, gas air mata, stik no radio komunikasaun,” nia hateten.
Komando hatuun nia membru barak iha elisaun ne’e, tanba nia dehan partidus politiku mos barak se polisia sei fo seguransa durante halo kampanha to’o elisaun remata.
Iha parte seluk Deputada Anna Ribeiro, hateten PNTL sira nia papel importante tebes atu fo seguransa ba iha elisaun jeral tinan ida ne’e.
“Sira tenke preparadu, atu nune’e seguransa iha rai laran bele la’o ho diak,” nia hateten.
Kona ba orsamentu, nia dehan foin lalais parlamentu nasional mos aprova ona orsamentu balun ba Ministeriu Interior atu haree ba PNTL nia nesesidade.
“Osan iha ita tau, tanba ami konsidera ne’e importante,” nia dehan.