- Publika iha: 26 Janeiro 2017
Bazea ba rezultadu resensiamentu ne’ebe mak governu halo iha nasaun Portugal no Australia inklui rai laran, total eleitores ne’ebe sei tuir votasaun iha elisaun jeral 2017 mak hamutuk 747.583.
Diretor Jeral Sekretariadu Tekniku Administrativu Eleitoral (STAE), Acilino Manuel Branco, hateten husi total 747.583, eleitores iha rai laran hamutuk 746.251, enkuantu husi Portugal no Australia hamutuk 1.332 eleitor.
“Resensiamentu halo ona, e sira ne’ebe mak karik la tama iha lista resensiamentu maibe sira iha kartaun eleitoral, sira bele vota,” Diretor STAE Branco hateten, iha Dili.
Kona ba resensiamentu ba sidadaun sira ne’ebe hela iha rai liur, governu halo deit iha nasaun rua, nia hateten ne’e bazea ba desizaun parlamentu no rezulusaun governu nian.
Nia hateten, eleitores timoroan ne’ebe hela iha rai liur, sira sei tuir votasaun iha embaixada no konsuladu sira ne’ebe estabelese ona, depois mak informa rezultadu.
“Sentru votasaun sei tau iha embaixada sira e prosesu ne’e hanesan deit, nune’e mos iha Timor,” nia dehan.
Nia informa, dadaun ne’e STAE prepara hela tekniku sira inklui halo ajustamentu kona ba preparasaun fiskais no halo koordenasaun ho partidus politiku sira hodi hahu hatama pontus fiskais no lista fiskais.
Iha parte seluk Deputadu Arao Noe, orgulhu ho servisu STAE nian kona ba implementasaun lei resensiamentu iha rai laran inklui rai liur.
“Lei ne’e ami prova iha tinan kotuk no sira implementa duni,” nia dehan.
Nia rekonese mos, katak iha sistema resensiamentu ne’e, define deit nasaun Portugal no Australia mak bele halo resensiamentu no tuir elisaun, tanba nasaun rua ne’e mak iha eleitores rezidentes permanente.
“Kuandu iha rai seluk, sira ba la’os hela, maibe sira ba eskola no balun servisu,” nia informa.
