Feto kandidatura partidus politiku (parpol) nain 12 tuir formasaun no briefing kona ba konseptu demokrasia, direitus humanus, metodu distribuisaun kadeira no tekniku kampanha ba sira.

Organizasuan feto PATRIA fo briefing ba kandidaturas feto parpol sira ne’ebe konkore iha ELPAR kona ba papel membru parlamentu nian.

Diretora organizasaun PATRIA, Laura Menezes Lopes hateten objetivu husi briefing no formasaun ne’e mak atu haforsa konesementu kandidata sira nian ba prosesu elisaun no papel membrus parlamentu nasional nian tuir lei.
“Sira (kandidata) fila, ba fahe fali informasaun sira ne’e ba nia maluk iha partidu laran no sosiedade iha tempu kampanha kona ba konseptu demokrasia ne’ebe lolos,” nia hateten.
Nia sente triste, tanba maluk feto sira iha partidu husu organizasaun feto sira atu organiza atividade briefing ba sira, maibe sira la partisipa maximu iha atividade ne’e rasik.
Nia informa, 20 parpol inklui bloku koligasuan ida mak konkore iha elisaun parlamentar (2017-2022), maibe partisipa deit husi partidus (ki’ik) 10 no partidus bo’ot hanesan Fretilin, CNRT, PD no PLP la marka prezensa.
Alende ne’e, nia dehan iha mos informasaun seluk husi Sekrtariadu Tekniku Administrasaun Estatal (STAE) no Comisaun Nasional Elisoens (CNE) ba partisipante sira kona ba prosedimentu no prosesu eleisaun ne’e rasik.
Atividade briefing ne’e hala’o durante loron ida tomak no hetan suporta husi governu (Sekretario Estado Apoiu Promosaun Sosio Ekonomia Mulher), STAE no UN Women.
Enkuantu, kandidatura husi partidu Frente Mudansa, Terezina Cardoso Gomes agradese ba organizasaun PATRIA ne’ebe fo ona oportunidade ba sira hodi haklean sira nia konesementu kona ba papel legislative nian.
Nia dehan, problema sosial ne’ebe feto hasoru iha moris lor-loron mak sai motivasaun bo’ot ba nia atu kandidata aan hodi bele sai lian ba feto sira liu –liu iha area rural.
“Fo oportunidade ba ami hodi rona informasaun sira ne’e, nune’e karik ami hetan fiar tuur iha parlamentu, ami iha ona konesementu atu hala’o ami nia knar tuir lei,” nia hateten.
Nia dehan, papel orgaun legislative mak halo lei, fiskaliza no halo desizaun politika ba interese nasional.
Iha parte seluk, Diretor organizasaun AJAR, Jose Luis Oliveira hateten elisaun mak eventu importante ba direitu politiku povu nian atu hili nia reprezentante, la’os festa.
Nia hatutan, demokrasia ne’e sistema ida atu povu bele ezerse sira nia direitu hodi hili ukun nain no partisipa ativu iha prosesu dezenvolvimentu.
“Ita (povu) fo votus ne’e direitu politiku, nune’e ita mos tenke hetan de-troka ou rezultadu nudar obrigasaun politika nain sira,” nia hateten.
Nia dehan, de troka ne’e la’os fo osan no material ba povu, maibe politika ne’ebe diak hodi hadia povu nia moris.