Observador international nain 300 resin husi delegasaun diferente destaka ona iha munisipios inklui regiaun espesial Oe-Cusse hodi halo observasaun ba iha prosesu elisaun parlamentar (ElPar) tinan ne’e.

Observadores internasional 300 resin mak dadaun ne’e destaka ona iha munisipius hotu hodi observa prosesu tomak elisaun parlamentar nian.

Diretor Jeral Sekretariadu Tekniku Administrasaun Eleitoral (STAE), Acilino Manuel Branco hateten observadores ne’e mai husi nasaun Thailandia, Japaun, Australia, Uniaun Europea, delegasaun ASEAN nian inklui mos reprezentante husi embaixada sira ne’ebe eziste iha Timor–Leste.
Nia dehan, numeru observador iha elisaun parlamentar bo’ot liu kompara ho elisaun prezidensial iha fulan Marsu liu ba, tanba numeru observador nasional mos aumenta kuaze ema 4 mil resin husi organizasaun difrente mos.
Nia rekonese, papel observador sira nian importante tebes atu asegura prosesu elisaun ne’ebe kredibel ba iha governu foun mai.
“Sira nia relatoriu ne’e importante tebes atu ita haree, iha defisiensia ruma karik ita konsidera no hadia sai diak liu tan iha elisaun sira tuir mai,” nia hateten, iha Timor Plaza, Dili.
Nia dehan, relatorio observador sira ne’e sei kompletu tebes tanba sira halo observasaun ba prosesu tomak hahu husi partisipasaun, seguransa, logistika no prosedimentu sira ne’ebe iha fasilita duni votantes.
Enkuantu, Vise Ministru Adminsitrasaun Estatal (MAE), Thomas Cabral husu atu observadores no media sira atu divulga informasaun ne’ebe lolos ba publiku atu iha kredibilidade ba prosesu elisaun iha Timor–Leste.
“Governu sei laiha intervensaun politika, maibe governu iha obrigasaun atu fasilita no asegura prosesu tomak,”nia hateten.
Nia mos, husu observador international sira atu atu haree defisiensia ruma no violasaun ruma ne’ebe komete husi partidus politiku favor tau iha relatorio atu Timor–Leste bele konsidera hodi hadia diak liu tan iha futuru.
Iha parte seluk, Reprezentante UN iha Timor –Leste Knut Ostby hateten tinan primeiru ba Timor–Leste organiza elisaun mesak hafoin misaun espesial ONU nian husik Timor.
Nia dehan, papel UN nian sei iha maibe suporta husi kotuk liu –liu fo supporta asistensia teknika, hasae kapasidade official eleitoral sira, halo eduaksaun sivika no seluk tan.
“Imi nia papel importante tebes atu asegura elisaun ne’ebe iha kredibilidade, transparansia, honestu no livre,” nia hateten.