- Publika iha: 18 Abril 2016
Diretor Nasional kanalizasaun Bee Moos Sekretariadu Estadu Abastamentu e Saneamentu (SAS), Gustavo da Cruz, hateten komunidade iha area rural 72% (13 munisipius) mak asesu ona ba bee moos.
Nia hateten, prosesu kanalizasaun bee moos ba komunidades iha area rural ne’e la’os servisu governu mesak, maibe hetan mos ajuda husi parseiru dezenvolvementu sira.
“Komunidade area rural aserka de 72% mak asesu ona ba bee moos ne’ebe mak fura husi governu rasik no parseiru dezemvolvementu sira,” Diretor da Cruz hateten, iha Dili.
Maibe, nia dehan, iha monta bomba balun hahu aat fali ona tanba komunidade rasik la kuida ho diak inklui mos grupu fasilidade husi SAS rasik la halo manutensaun.
“La halo manutensaun tanba osan laiha, nune’e mos attitude komunidade rasik ne’ebe mak ladun kuida didiak bee sira ne’e,” nia hateten.
Maske nune’e, nia hateten, iha tinan 2016 ne’e governu sei preve osanmentu $2 miloens hodi halo manutensaun no reparasaun ba funsionamentu bee hirak ne’e, inklui kanaliza tan bee balun ba komunidades ne’ebe durante ne’e ladauk asesu ba bee moos.
“Governu konsentra liu ba operasuan manutensuan ba bomba nasional e espera katak iha tinan ida ne’e ami bele redus bomba nebe mak avarias iha area rurais sira atu nune’e bele funsiona,” nia dehan.
Iha parte seluk Deputada Anna Ribeiro, rekonese komunidade balun asesu ona ba bee moos, maibe komunidade iha area remotas liu to’o agora seiduak.
“Bee moos ne’e sai preokupasaun iha baze, komunidade barak liu mak seidauk hetan bee moos, liu-liu iha area ne’ebe remotas liu,” nia dehan.
Maibe, nia dehan, kada tinan governu sempre iha planu ne’ebe adekuadu atu nafatin esforsu hodi komunidade bele asesu hotu ba kanalizasaun bee moos.
Iha fatin seluk komunidade Mario Fernandes, rekonese iha komunidade balun hahu asesu ona ba bee mos, maibe balun seidauk.
“Tenke esforsu, atu nune’e hotu-hotu bele asesu ba bee moos,” nia sujere.